Il-kap tal-Mercedes Toto Wolff ammetta li ż-żewġ sewwieqa tat-tim Nico Rosberg u Lewis Hamilton saru qishom żewġ għedewwa. Dawn it-tnejn bħalissa qed jissieltu kontra xulxin għar-rebħ tat-titlu fejn s’issa Hamilton rebaħ sitt Grand Prix u Rosberg rebaħ erbgħa. Madankollu Rosberg qed igawdi vantaġġ ta’ 22 punt fuq Hamilton minħabba f’diversi tlielaq l-Ingliż kellu jirtira. It-tensjoni bejn dawn it-tnejn kompliet tikber meta Rosberg, waqt il-GP tal-Belġu daħal f’Hamilton u spiċċa fit-tieni post filwaqt li Hamilton kellu jirtira. L-eks sewwieq tal-McLaren esprima r-rabja tiegħu minħabba li Rosberg ma kienx penalizzat, la mill-FIA u lanqas mit-tim tiegħu. Fl-aħħar GP li sar, dak tal-Italja, Hamilton għeleb l-isfida ta’ Rosberg biex naqqas id-distakk minn mal-lider.
“Ir-relazzjoni bejn dawn it-tnejn inbidlet. Qabel kienet relazzjoni bejn żewġt iħbieb imma issa aktar saru qishom żewġ għedewwa. Din m’hijiex sorpriża għalija għax kulħadd jaf x’qed jippruaw jirbħu. Din hi esperjenza ġdida għalihom u t-tim m’għadux f’qagħda fejn jista’ jagħti ordni lil xi wieħed minnhom,” qal Wolff.
Filwaqt li għal Rosberg din hi l-ewwel darba fil-karriera tiegħu li qed jissielet għar-rebħ tat-titlu għal Hamilton din m’hijiex l-ewwel darba u fl-2008 kien fil-fatt rebaħ it-titlu meta kien għadu mal-McLaren.
