Floriana Basketball Club dan l-istaġun se jkunu qed jiġu sponsorjati minn Café del Mar u b’hekk l-isem tat-tim se jkun Floriana Café del Mar.
Dettalji ngħataw waqt konferenza tal-aħbarijiet fl-istabbiliment ta’ Café del Mar f’Buġibba, fejn il-President tal-klabb Ian Mercieca qal li dan il-ftehim għen lill-klabb b’mod sostanzjali sabiex ikollu l-aħjar tim possibli. Preżenti wkoll kien hemm ukoll il-kowċ Chris Stolp.
Il-President ippreżenta uffiċjalment il-plejers li l-klabb irreġistra din is-sena. Dawn huma Nikola Vasovic li kien fost l-ewwel li ngħaqad mal-klabb. Huwa sosnta li Nikola hu wieħed mill-aktar plejers promettenti fll-basketball Malti fejn lagħab seba’ staġuni ma’ Luxol Basketball Club u rebaħ numru ta’ kompetizzjonijiet fosthom it-Tazza Louis Borg u l-Kampjonat ta’ taħt it-23 sena.
Plejer ieħor hu Nigel Sultana, meqjus minn ħafna bħala wieħed mill-aħjar talenti tal-ġenerazzjoni tiegħu. Sultana mhux biss se jsaħħaħ l-iskwadra għall-istaġun li jmiss, iżda se jkun protagonist essenzjali għall-futur tal-klabb. Nigel, kien ukoll parti mit-tim Nazzjonali Malti li rebaħ midalja tal-fidda fil-Kampjonati tal-Pajjiżi ż-Żgħar li saru f’Ġibiltà f’Lulju.
It-tielet plejer huwa Marco Mercieca li tul il-karriera kollha tiegħu s’issa lagħab dejjem ma’ Luxol u wkoll rebaħ diversi unuri inkluż il-Louis Borg Cup fl-aħħar staġun. Fl-aħħar snin kien ukoll captain tat-tim.
L-aħħar akkwist Malti hu Lee Ross, plejer ta’ talent u fiżika kbira. Lee lagħab l-aħħar staġun ma’ Siġġiewi kif ukoll għamel xi staġuni ma’ Luxol. Fl-istaġun li għadda Lee kien meqjus bħala wieħed mill-aqwa plejers fil-kampjonat Malti.
Flimkien ma’ dawn l-erba’ plejers Floriana Basketball Club ħadu wkoll lill-Amerikan Jules Montgomery. Jules twieled fid-29 Marzu 1991 u hu ggradwat mill-Prairie View A & M. Lagħab żewġ staġuni konsekuttivi fil-kampjonat SWAC u kien ippremjat bħala l-pre-season plejer tas-sena tas-SWAC.
Mercieca f’isem il-klabb irringrazzja lil Viċi President Edward Torpiano għax-xogħol siewi tiegħu fin-negozjati u lil S. Ellul ta’ Café del Mar għall-appoġġ tiegħu u l-kollaborazzjoni kollha possibbli għall-benefiċċju taż-żewġ partijiet.
Min-naħa tiegħu Ellul waqt li qal li Café del Mar jifforma parti mill-kumpless tal-Malta National Aquarium u hu l-post ideali fejn wieħed jirrilassa, jgħum u jgawdi xarba tajba f’atmosfera unika, awgura sena ta’ suċċess lill-iskwadra tal-Floriana għall-istaġun li se jibda fl-4 Ottubru.
Intant il-klabb tal-Basketball ta’ Siġġiewi Remax ħabbar li akkwista lill-Amerikan ta’ 28 sena Kent Tribett għall-istaġun il-ġdid. Tribett hu twil kważi seba’ piedi.
Matul il-karriera tiegħu, Kent lagħab f’diversi pajjiżi fosthom il-Fillandja, Spanja, u anke l-Awstralja.
Intant, Siġġiewi Remax ħabbru wkoll li laħqu ftehim mal-klabb ta’ Athleta għall-akkwist tal-plejer promettenti ta’ 19-il sena Benoit Bartolo.
L-istaġun li għadda Bartolo rebaħ l-unur tal-aqwa plejer tas-sena fil-kategorija tiegħu.
