Il-karozza ta’ Nico Rosberg, li biha kellu jirtira mill-Grand Prix ta’ Singapore kienet ikkontaminata b’xi sustanza. Dan qaluh id-diriġenti tat-tim stess fejn spjegaw li din is-sustanza instabet fil-parti li tikkontrolla l-isteering u li minħabba fiha il-karozza ma iffunzjonatx tajjeb. Hekk kif il-karozzzi għamlu l-warmup lap Rosberg diġa’ kellu problemi bil-karozza u qabel ma bdiet it-tellieqa saru xi tiswjiet ta’ malajr fil-pitstop imma mal-14-il dwara Rosberg kellu jirtira.
Is-sustanza is-soltu tintuża fil-fabbriki meta l-karozzi jingħataw service qabel ma jintbagħtu fuq il-vapuri li jeħduhom fil-post fejn tkun se ssir it-tellieqa. Is-sustanza li tpoġġiet fil-karozza ma kinitx tidher u fil-jumejn ta’ qabel, jiġifieri waqt il-provi liberi, ma ikkawżat l-ebda problema lill-karozza ħlief fil-jum tat-tellieqa.
Filwaqt li Rosberg kellu jirtira, sieħbu Lewis Hamilton rebaħ il-Grand Prix biex qabeż lill-istess Rosberg u fetaħ vantaġġ ta’ tliet punti f’ras il-klassifika.
Il-Mercedes qalu li biex jevitaw kull riskju li jerġa’ jiġri hekk, fil-GP li jmiss, jiġifieri f’Suzuka fil-Ġappun, se tintuża karozza ġdida.
