FORMULA 1: Is-sewwieq tal-Ferrari Kimi Raikkonen qal li qed jidra l-karozza u qed jistenn li minn issa ‘l quddiem jikseb riżultati aħjar mat-tim Taljan. Bħalissa Raikkonen jinsab fil-11-il post fil-klassifika tas-sewwieqa u qabel l-istaġun ħafna kienu dawk li stennew li kien se jmur aħjar. Sieħbu Fernando Alonso qed imur ħafna aħjar u qiegħed fir-raba’ post tal-klassifika.
F’kummenti li ta matul il-ġimgħa Raikkonen qal, “F’Singapore kellna karozza li biha stajna mmoru tajjeb. Hi ħassra li fit-tielet sessjoni kien hemm problema teknika żgħira u li minħabba fiha konna affettwati b’mod negattiv waqt it-tellieqa. Jien kont kuntent ħafna bil-fatt li għall-ewwel darba dan l-istaġun ħassejtni komdu bil-karozza u nemmen li issa kapaċi nikseb ir-riżultati li nixtieq,” qal Raikkonen.
Is-sewwieq Finlandiż qal li ma jistax jipprevedi kif se jmur it-tim fi tmiem il-ġimgħa waqt il-Grand Prix ta’ Suzuka fil-Ġappun. “Ma nafx kif se mmoru fi tmiem il-ġimgħa imma li hu żgur hu li Suzuka hi ċirkwit li hu adattat ħafna għas-sewqan tiegħi. Kienet biss darba li kelli nirtira minn dan il-GP filwaqt li fl-2005 irbaħt b’wirja mill-aqwa,” kompla jgħid Raikkonen.
Ir-relazzjoni ma’ Vettel għadha tajba
Is-sewwieq Awstraljan Daniel Ricciardo qal li minkejja li qed iġib riżultati aqwa minn Sebatian Vettel, ir-relazzjoni bejniethom it-tnejn għadha waħda tajba. Qabel l-istaġun kulħadd stenna li Vettel, champion renjanti, kien se jmur ferm aħjar minn Ricciardo li qed isuq għall-ewwel darba mar-Red Bull. Madankollu, Ricciardo qiegħed fit-tielet post tal-klassifika filwaqt li Vettel qiegħed il-ħames, 57 punt taħtu. Barra minn hekk, Ricciardo hu l-uniku sewwieq minbarra l-koppja tal-Mercedes, li rebaħ xi tellieqa. Fil-fatt hu rebaħ il-Grand Prix tal-Kanada, tal-Ungerija u tal-Belġju. L-Awstraljan qiegħed 60 punt taħt il-lider Lewis Hamilton.
“Minkejja li irbaħt tliet Grand Prix u Vettel ma rebaħ xejn ir-relazzjoni bejnetina għadha l-istess. Nemmen li bħala relazzjoni bejn żewġ sewwieqa tal-istess tim ma tistax tkun aħjar milli hi,” qal Ricciardo. Ta min jiftakar li Ricciardo, fl-ewwel GP tal-istaġun fl-Awstralja kien spiċċa t-tieni post imma kien skwalifikat minħabba ksur ta’ regoli.
Fl-istaġun li għadda r-relazzjoni bejn Vettel u l-eks sewwieq tar-Red Bull Mark Webber ma kinitx waħda tajba u din kompliet sejra għall-agħar meta Vettel ma obdiex struzzjonijiet biex jibqa’ wara sieħbu Webber.
It-tensjoni bejn żewġ sewwieqa mill-istess tim m’hijiex xi ħaġa ġdida f’dan l-isport u dan l-istaġun qed tispikka t-tenjsoni u r-rivalità li hemm bejn il-koppja tal-Mercedes Lewis Hamilton u Nico Rosberg. Dawn it-tnejn qed jissieltu għar-rebħ tat-titlu u bħalissa Hamilton għandu vantaġġ ta’ tliet punti fuq Rosberg. Ftit tax-xhur ilu Rosberg kien ħabat f’Hamilton waqt il-GP tal-Belġju u riżultat ta’ dan, l-Ingliż kellu jirtira filwaqt li Rosberg kien spiċċa t-tieni. L-istess kap tal-Mercedes Toto Wolff kien wasal biex ammetta li Hamilton u Rosberg saru qishom żewġ għedewwa, anke jekk Hamilton ipprova jikkalma s-sitwazzjoni u qal li r-relazzjoni reġgħet lura għan-normal.
