FORMULA 1: Is-sewwieq tal-Mercedes Lewis Hamilton irreġistra l-aħjar ħin waqt it-tieni sessjoni ta’ provi liberi għall-Grand Prix ta’ Suzuka fil-Ġappun. Is-sewwieq Ingliż għamel l-aħjar dawra f’ħin ta’ 1.35.078 28′ biex b’hekk spiċċa quddiem sieħbu Nico Rosberg li fl-ewwel sessjoni kien l-aktar veloċi b’ħin ta’ 1.35.461′.
Hamilton u Rosberg qed jissieltu għar-rebħ tat-titlu u Hamilton għandu vantaġġ ta’ tliet punti fuq Rosberg fil-klassifika. It-tielet l-aħjar ħin waqt it-tieni sessjoni għamlu Valtteri Bottas tal-Williams filwaqt li Jenson Button tal-McLaren irreġistra r-raba’ l-aħjar ħin.
Iċ-champion renjanti Sebastian Vettel irreġistra l-ħames l-aħjar ħin filwaqt li sieħbu Daniel Ricciardo spiċċa ħabat.
Waqt is-sessjoni ħabtu wkoll Kamui Kobayashi u Esteban Gutierrez. Intant, is-sewwieq tat-Toro Rosso, Max Verstappen niżżel ismu fl-istorja u sar l-iżgħar sewwieq li qatt saq fil-Formula 1 meta ħa sehem fl-ewwel sessjoni ta’ provi. Hu kien sejjer tajjeb sakemm kelu jieqaf minħabba problemi fil-magna.
