L-FIA fetħet investigazzjoni biex tara eżatt x’wassal għall-inċident li kellu s-sewwieq tal-Marussia Jules Bianchì waqt il-Grand Prix tal-Ħadd li għadda fil-Ġappun. Il-Franċiż weġġa’ wara li laqat tractor li kien qed ineħħi karozza oħra maħbuta fuq it-track. Dan wassal biex it-tiġrija twaqqfet wara 44 dawra.
Il-President tal-FIA Jean Todt ordna biex issir investigazzjoni u qed jistenna lid-Direttur tat-Tellieqa Charlie Whiting biex jippubblika r-rapport tiegħu qabel il-Grand Prix tal-Ħadd li ġej f’Sochi, ir-Russja. Bħal Todt, il-Kap tal-Formula1 Bernie Ecclestone ukoll talab biex issir inkjesta.
Jidher li l-enfażi qed issir biex ikun magħruf għalfejn mill-inċident ta’ Sutil fuq Sauber sakemm ħarġet is-Safety Car u l-Ambulanza laħqu għaddew tliet minuti, meta mill-inċident ta’ Sutil għal dak ta’ Bianchì kien hemm anqas minn minuta.
