FORMULA 1: Il-Britanniku Lewis Hamilton iddomina l-ewwel Grand Prix tal-Formula 1 li qatt sar fir-Russja biex kiseb id-disa’ rebħa tiegħu din is-sena, ir-raba’ waħda konsekuttiva u kabbar il-vantaġġ f’ras il-klassifika.
Sieħbu tal-istess tim Nico Rosberg kellu jissielet wara żball fl-ewwel dawra biex temm it-tieni u b’hekk issiġilla t-titlu tal-kostrutturi għall-Mercedes.
Rosberg issa għandu 17-il punt wara Hamilton meta fadal tliet tiġrijiet u massimu ta’ 100 punt disponibbli.
B’din ir-rebħa Hamilton laħaq ukoll ir-rekord ta’ Nigel Mansell bħala l-aktar Brittanniċi li qatt rebħu tiġrijiet tal-Formula 1, 31.
Qabel it-tiġrija s-sewwieqa kollha sellmu lill-Franċiż ta’ 25 sena Jules Bianchi tal-Marussia li kellu inċident ikrah il-ġimgħa l-oħra f’Suzuka u għadu qed jissielet għal ħajtu fil-Ġappun.
Għat-tiġrija attenda wkoll il-President Russu Vladimir Putin li kien strumentali biex irrealizza l-ħolma tal-kap tal-F1 Bernie Ecclestone li jsir Grand Prix fir-Russja u kuntrarju għas-soltu, Ecclestone għamel it-tiġrija kollha bilqegħda ħdejn Putin.
L-unika darba li Hamilton deher vulnerabbli kien meta Rosberg resaq ħdejh fl-ewwel kantuniera imma l-Ġermaniż ibbrejkja tard u llokkja ż-żewġ roti ta’ quddiem biex kellu joħroġ mill-korsa.
Rosberg reġa’ daħal quddiem imma kien mill-ewwel ordnat imur wara Hamilton għaliex kien kiser ir-regolamenti u ħa vantaġġ meta qata’ l-kantuniera. Huwa għażel li jbiddel mill-ewwel it-tyres.
Hawnhekk ħareġ fl-aħħar post imma malajr tela’ t-tielet wara Bottas tal-Williams wara li l-karozzi ta’ quddiem kienu għamlu l-pit stop.
Jiġri x’jiġri fil-GP li jmiss fl-Amerika, Hamilton ma jistax jaċċerta mit-titlu matematikament qabel almenu l-Grand Prix tal-Brażil li se jkun ta’ qabel l-aħħar u l-isfida issa hi biss bejnu u Rosberg għaliex Daniel Ricciardo tar-Red Bull jinsab 92 punt taħt Hamilton.
Bottas temm it-tielet quddiem Jenson Button u Kevin Magnussen tal-McLaren. Dan ifisser li għall-ewwel darba karozzi b’makna Mercedes spiċċaw fl-ewwel ħames postijiet.
Fernando Alonso tal-Ferrari temm fis-sitt post quddiem Ricciardo, Sebastien Vettel u Kimi Raikkonen.
Sergio Perez tal-Force India ħa l-aħħar punt meta temm fl-10 post.
