Is-sewwieq tal-Marussia Jules Bianchi “mhux se jċedi” minkejja li għadu f’kundizzjoni kritika wara l-inċident li kellu fil-GP tal-Ġappun. Dan qalu missieru Philippe.
Il-Franċiż ta’ 25 sena sofra injuries serji f’rashu meta baqa’ dieħel taħt tractor li kien qed ineħħi l-karozza maħbuta ta’ Adrian Sutil mill-ġenb taċ-ċirkwit.
“Is-sitwazzjoni hi ddisprata” qal Philippe Bianchi. “Kull darba li jċempel it-telefon, nafu li jista’ jkun l-isptar biex jinformana li Jules hu mejjet. Mhux se jċedi. Ninsab ċert. Dan nista’ narah u nemmen fih.”
Hu żied jgħid waqt intervista ma’ La Gazzetta dello Sport, “Inkellmu u naf li qed jismagħni. It-tobba qalulna li dan diġà hu miraklu għaliex ħadd qatt ma għex daqshekk wara inċident bħal dan. Imma Jules mhux se jċedi. It-trainer tiegħu Andrea qal li jekk hemm persuna waħda li tista’ tagħmilha, hu Jules.”
Philippe qal li l-familja hi kommossa bl-affett qawwi mis-sewwieqa tal-Formula 1 li nġabru quddiem il-grid qabel il-GP tar-Russja b’idejhom fuq spallejn xulxin b’sinjal ta’ solidarjetà għal Jules.
“Qatt ma rajt ħaġa bħal din. Ħassejna ruħna kommossi u nirringrazzjaw lil kull wieħed minnhom. Ħafna minnhom kitbuli, Alonso, Vergne, Massa, kollha kellhom messaġġi qawwija. Hamilton kitibli email mill-isbaħ li fiha qalli li jekk hemm xi ħaġa li jista’ jagħmel, qiegħed hemm. Anke Rossi u Marquez mill-MotoGP.”
Philippe qal ukoll li qed juża l-inċident li kellu s-seba’ darbiet champion tad-Dinja Michael Schumacher – li qed jirkupra saħħtu fid-dar tiegħu wara li weġġa’ rasu b’mod gravi – bħala punt ta’ riferiment.
“Kont dispjaċut ħafna meta weġġa’ Schumacher u kont nistaqsi għalfejn ma jgħidulniex aktar dwar kif inhu. Illum ninsab fl-istess sitwazzjoni u nista’ nifhem. Kulħadd jistaqsini dwar Jules imma ma nistax nirrispondi. M’hemmx risposta. Hi serja ħafna imma hu stabbli. Kultant jidher ftit aħjar u drabi oħra ftit agħar. It-tobba ma jgħidulek xejn. Il-ħsara tal-inċident hi kbira imma ma nafux kif se tevolvi. Anki Schumacher ħa xhur biex ħareġ mill-koma. Irridu biss nistennew.”
