Fernando Alonso jinsab ferm viċin li jiffirma kuntratt mal-McLaren. Id-darbtejn Champion tad-Dinja li se jitlaq lil Ferrari sentejn qabel jintemmlu l-kuntratt kien qed jiddeċiedi bejn jekk jingħaqadx mal-McLaren inkella jieħu sena mistrieħ.
Madankollu issa jidher li ntlaħaq ftehim biex l-Ispanjol jirritorna mat-tim li kien telaq wara staġun wieħed biss fl-2007.
McLaren issa jidher li għandhom dibattitu dwar jekk iżommux lil Jenson Button jew Kevin Magnussen bid-Daniż jidher l-akbar favorit.
In-negozjati bejn Alonso u l-McLaren dwar id-dettalji kollha tal-kuntratt tiegħu għadhom mhux kompluti imma sorsi qalu li jinsabu ferm viċin tant li issa tkun ħasda kbira jekk is-sewwieq ta’ 33 sena ma jingħaqadx magħhom.
Oriġinarjament Alonso ried kuntratt ta’ sena biex ikun liberu fl-2016 imam issa aktarx li jiffirma kuntratt għall-2015 u l-2016 b’għażla li jġeddu għal sena oħra.
Li Alonso jingħaqad mal-McLaren li mill-istaġun li ġej se jkollhom makna Honda kienet meqjusa bħala l-aħjar għażla għal Alonso sa minn meta deher ċar li kien se jitlaq lill-Ferrari.
Waqt il-GP tal-Istati Uniti fi tmiem il-ġimgħa l-Ispanjol ammetta li “l-mossa tiegħu probabbilment mhux se tkun sorpriża kbira.”
Huwa qal, “Għandi pjan ambizzjuż f’moħħi għall-futur tiegħi li naħseb li hu wkoll l-aħjar għal Ferrari. Jekk dan iseħħ, in-nies se jkunu eċċitati ħafna kif jien, jien. L-affarijiet kollha li ġraw fl-aħħar tliet xhur huma eżatt dawk li ppjanajt,” qal Alonso.
Il-Ferrari għadhom ma ħabbrux uffiċjalment li Alonso se jitlaq, lanqas li se jkun iċ-Champion renjanti Sebastien Vettel li se jeħodlu postu.
Min-naħa l-oħra McLaren qed iżommu lil Button u Magnusson jistennew sakemm jiffinalizzaw ma’ Alonso li ilhom jiġru warajh aktar minn sena.
Għalkemm għadhom ma ddeċiedewx jidher li huma aktar interessati li jżommu lid-Daniż ta’ 22 sena milli lil Button.
