FORMULA 1: Il-Ġermaniż Nico Rosberg issupera lil-lider preżenti tal-klassifika Lewis Hamilton tal-istess tim tal-Mercedes biex kiseb l-aħjar ħin fiż-żewġ sessjonijiet ta’ provi liberi għall-Grand Prix tal-Brażil li se jsir għada. Rosberg kien ukoll aktar veloċi minn Hamilton fl-ewwel sessjoni u temm 0.221 sekondi aħjar mill-Britanniku fl-ewwel sessjoni u 0.213 sek fit-tieni waħda.
Hamilton li għandu 24 punt vantaġġ fuq Rosberg meta fadal 75 punt disponibbli fl-aħħar żewġ tiġrijiet ikkomprometta s-sessjoni meta ħareġ barra mit-track għal mument qasir.
Kimi Raikkonen tal-Ferrari kiseb it-tielet l-aħjar ħin għalkemm l-iscuderija Ferrari kompliet bis-serje negattiva hekk kif Fernando Alonso waqaf mal-ġenb tat-track b’duħħan abjad ħiereġ minn wara tal-karozza u eżatt malli waqaf il-karozza nħakmet ukoll min-nirien bl-Ispanjol joħroġ mill-ewwel mill-karozza u jkun hu stess li kkontrolla n-nar. Dan l-inċident wassal biex is-sessjoni kellha tieqaf għal madwar għaxar minuti.
Daniel Ricciardo tar-red Bull kellu r-raba’ l-aħjar ħin quddiem Valtteri Bottas u Felipe Massa it-tnejn tal-Williams. Alonso rnexxielu jżomm it-tmien l-aħjar ħin minkejja l-inċident quddien Daniil Kvyat ta’ Toro Rosso u Sebastien Vettel tar-Red Bull. L-uniku sewwieq li m’għamilx ħin f’din is-sessjoni kien Sergio Perez tas-Sauber.
