Għal bini b’ċinema biex jużah bħala każin, il-Partit Laburista se jħallas daqs min hu fil-kategorija ta’ riskju ta’ faqar biex ikollu post ta’ akkomodazzjoni
Mhux biss kien l-eks-Mexxej Laburista u eks-Prim Ministru Mintoff li daħak bil-familja sid il-proprjetà tal-każin Laburista f’Ħal Qormi, iżda daħak bihom ukoll il-Partit Laburista ta’ Muscat.
Id-Deputat Nazzjonalista Clyde Puli qal fil-Parlament, li minkejja li l-proprjetarji tal-Każin Laburista f’Ħal Qormi fl-2011 ġew imwiegħda mill-Prim Ministru, dak iż-żmien Kap tal-Oppożizzjoni, li se jibdew jingħataw kirja ġusta, din il-wegħda tal-Prim Ministru baqgħet sal-lum ma materjalizzatx minkejja li l-familja baqgħet tikkorrispondi mal-Kap tal-Partit Laburista anke sal-2013.
Meta tkellem fil-Parlament dwar l-abbozz ta’ liġi li jirregola l-partiti politiċi, id-Deputat Nazzjonalista semma li l-każin Laburista ta’ Ħal Qormi, li kien akkwistat mingħand il-familja Mizzi fl-1951 fi żmien Mintoff, kien akkwistat fuq bażi ta’ kirja għal sentejn, u fuq bażi li jekk ikun hemm qbil jiġġeded għal sentejn oħra. Iżda minflok spiċċa biex baqa’ għand il-Partit Laburista għal 60 sena sħaħ, minkejja li l-ftehim ta’ tiġdid qatt ma ntlaħaq.
Il-familja ssostni li tul is-snin huma ppruvaw jitkellmu mal-Partit Laburista biex tinstab soluzzjoni, u ressqu lill-Partit Laburista bl-għażliet ġusti u diċenti li jew jixtru u jżommu l-proprjetà, jew jirritornawha lill-familja, inkella l-kera togħla skont il-prezz tas-suq tal-lum.
Imma l-Partit Laburista m’aċċettax u qed jippretendi li din l-inġustizzja tkompli qisu qatt ma kien xejn, għaliex ma jridx jitlaq din il-proprjetà minn idejh u allura mhux jippermetti lill-werrieta u allura lis-sidien veri tal-proprjetà jgawdu mill-frott tagħhom tal-proprjetà tagħhom u ta’ ħidmet missirijiethom.
Dwar din il-proprjetà f’Ħal Qormi, Clyde Puli qal li dan hu post kbir li kien jintuża bħala ċinema fiċ-ċentru tar-raħal, ħdejn il-Knisja ż-żgħira ta’ San Bastjan, b’valur kummerċjali li għalih il-Partit Laburista qed iħallas il-boqxiex.
Il-kera għal dan iċ-ċinema hija ta’ €198 fis-sena u jitħallas miċ-Ċentru Lokali Laburista ta’ Ħal Qormi, l-istess ħlas ta’ €197 li l-Gvern jitlob għal appartament żgħir tal-akkomodazzjoni soċjali u li jingħata lil min ikun fil-kategorija ta’ riskju ta’ faqar.
Tkellem ukoll dwar il-Każin Laburista tas-Siġġiewei u fisser kif il-Partit Laburista mhux biss kien inġust fl-1981 meta bl-aktar mod oxxen ħataf proprjetà pubblika, u nġust fl-1987 meta ġedded il-kirja għal perjodu ta’ 20 sena, iżda reġa’ kien inġust tal-anqas fl-intenzjoni meta għamel minn kollox biex ma jċedix il-proprjetà fis-Siġġiewi fl-2009.
Appella lill-Partit fil-Gvern biex ma jerġax jipprova jżomm il-proprjetà għad-detriment tal-poplu Siġġiewi meta ftit tax-xhur oħra tagħlaq il-kirja tal-biċċa proprjetà pubblika li għadhom jużaw.
Clyde Puli qal li llum Gvern Laburista lest jinvesti f’power station li m’għandniex bżonn, iżda mhux fil-partiti politiċi li kienu matul is-snin il-power houses tal-ideat.
Semma kif fis-sustanza, l-Oppożizzjoni taqbel mal-prinċipji ta’ din il-liġi iżda temmen ukoll li din il-liġi se titlaq zoppa mill-ewwel, għaliex il-Partit Laburista qed jitlaq b’vantaġġ kbir fuq kull partit ieħor minħabba kapital li akkumula b’makkakerija minn fuq dahar il-ġid pubbliku u saħansistra minn fuq il-ġid privat ta’ familji privati – kapital ta’ miljuni kbar permezz ta’ 28 proprjetà li qed jokkupa mill-Gvern jew mill-privat, flimkien mal-art tal-Australia Hall f’Pembroke u l-fabbrika tal-Marsa li tintuża bħala l-istudios tas-Super 1 TV.
Clyde Puli sfida lill-Partit Laburista fil-Gvern jagħti lura l-Każin ta’ Ħal Qormi lill-familja Mizzi, jagħti lura wkoll il-każin tas-Siġġiewi lill-Kunsill Lokali u l-komunità tas-Siġġiewi, u jrodd il-kumplament tal-proprjetajiet li ħa lill-poplu u lill-privat.
