EURO 2016
It-tim nazzjonali Malti il-Ħadd fit-8.45 p.m. jilgħab ir-raba’ partita tiegħu ta’ kwalifikazzjoni mill-Euro 2016 fil-Bulgarija. Il-kowċ Nazzjonali Pietro Ghedin għandu l-iskwadra kollha għad-dispożizzjoni fil-Vasil Levski Stadium. Dan wara li anke l-gowlkiper Andrew Hogg li weġġa’ ftit waqt l-aħħar sessjoni ta’ taħriġ li saret f’pajjiżna matul il-ġimgħa, irkupra tajjeb waqt li Clifford Gatt Baldacchino tħalla Malta wara li ma kienx mistenni jilħaq jirkupra għall-isfida tal-lum.
Wara s-sessjoni ta’ taħriġ tas-Sibt filgħodu u li kienet miftuħa għħall-media, il-midfielder ta’ B’Kara Paul Fenech qal li wara l-prestazzjoni tajba li kellhom fl-aħħar logħba kontra l-Italja, il-plejers kolha qed jistennew bil-ħerqa l-partita kontra l-Bulgarija.
“Se tkun logħba diffiċli imma wara l-aħħar riżultat li ksibna hawn irridu nagħtu prestazzjoni tajba biex forsi nieħdu xi ħaġa minn din il-partita.”
Mistoqsi dwar l-aħħar żewġ partiti f’pajjiżna, Fenech qal li l-importanti li wieħed iħares lejn il-pożittiv li sar u jibni fuqu.
“Irridu nieħdu l-pożittiv minn dawn il-partiti u nanalizzaw ukoll in-negattiv li sar waqt li nħarsu lejn il-logħba ta’ għada biex inkomplu bil-mod nagħmlu progress. Bi prestazzjoni tajba nistgħu naspiraw li forsi niskorjaw l-ewwel gowl tagħhna f’dan il-grupp ta’ kwalifikazzjoni.”
Preżenti għall-konferenza tal-aħbarijiet mal-media kien hemm ukoll il-midfielder ta’ Hibernians Clayton Failla li wkoll qabel ma’ dak li qal Fenech li se tkun diffiċli u semma wkoll it-telfa kbira li ġarrab it-tim Malti l-aħħar darba li lagħab fil-Bulgarija waqt il-kwalifikazzjoni għat-Tazza tad-Dinja tal-2014.
“Kulħadd jaf li se tkun logħba ferm diffiċli u rridu nuru karattru sod. Mhux qed nibżgħu minn din il-partita għaliex din se tkun logħba oħra. Fil-passat veru tlifna 6-0 u wara dik l-umiljazzjoni konna wrejna karattru f’pajjiżna u tlifna 2-1 kontra l-istess Bulgari. Din se tkun logħba kompletament differenti u nittamaw li niksbu riżultat tajjeb. Irridu biss niffokaw fuq din il-partita u ninsew dawk li għaddew biex nippruvaw nieħdu xi punti. Bħala tim irridu nagħtu prestazzjoni tajba u jekk nilagħbu b’mod kollettiv u nissieltu għal kull ballun, allura iva, nemmen li kapaċi nagħmluha,” qal Failla.
Min-naħa tiegħu il-kowċ Pietro Ghedin qal li kien kuntent jisma lill-plejes tiegħu jistqarru pubblikament li mhux qed jibżgħu.
“Irrid lit-tim tiegħi jilgħab il-futbol u jipprova jżomm il-pussess tal-ballun. Irridu ninżlu fil-ground konxji li kapaċi u li aħna tim tajjeb u fil-forma. Inħossni kburi meta nisma’ lill-plejers jitkellmu b’dan il-mod u għandi fiduċja fil-logbħa ta’ għada u li se jkollna logħba tajba.”
Ghedin qal li jikkunsidra lil-Bulgarija bħala tim elite fix-xena internazzjonali. Hu qal li l-Bulgari għandhom tim tajjeb ħafna u fl-aħħar kompetizzjoni tat-Tazza tad-Dinja kienu marru tajjeb ħafna anke jekk bħall-Maltin kienu fi grupp mill-aktar diffiċli.
Hu qal li din id-darba bdew tajjeb ħafna, kienu sfortunati waqt li sabu wkoll avversarji iebsa fi triqthom.
“Aħna wkoll għandna xi ħaġa li rridu npattu għaliha. Li tlifna 6-0 kienet iebsa ħafna għalina u rridu nkunu t-tim li konna qabel.”
Mistoqsi dwar kif se jaffettwa lit-tim in-nuqqas tal-captain Michael Mifsud li se jkun sospiż għal din il-partita wara li tkeċċa fl-aħħar logħba kontra l-Italja, Ghedin qal, “Michael hu s-simbolu tal-futbol Malti imma n-nuqqas tiegħu tagħna l-opportunità li naraw plejer żagħżugħ bħal Jean Paul Farrugia li jibda l-partita mill-bidu.”
Formazzjoni probabbli: A. Hogg, A. Agius, J. Caruana, S. Bezzina, R. Camilleri, P. Fenech, R. Muscat, R. Briffa, C. Failla, A. Schembri, JP Farrugia.
