FORMULA 1: Lewis Hamilton rebaħ it-titlu mondjali tas-sewwieqa għat-tieni darba fil-karriera tiegħu b’rebħa komda fl-aħħar tiġrija tal-istaġun waqt il-Grand Prix ta’ Abu Dhabi.
Hamilton li telaq mit-tieni post wara sieħbu tal-Mercedes u rivali għat-titlu Nico Rosberg, mar fuq quddiem wara ħruġ perfett u minn hemm ikkontrolla faċilment it-tiġrija sat-tmiem.
Ix-xogħol tiegħu sar aktar faċli meta Rosberg, li kien qed iżomm viċin tiegħu, sofra ħsarat fil-karozza, eżattament fis-sistema tal-hybrid u dan wasslu biex temm biss fl-14-il post.
Meta kien fadal żewġ dawriet Rosberg kien ordnat jirtira mill-inġiniera tal-Marcedes imma stqarr li xtaq ikompli sat-tmiem.
Hekk kif Hamilton qasam il-linja finali, il-Prinċep Harry li kien preżenti għat-tiġrija daħal fuq ir-radju u qal, “Prosit Lewis talli ma ħallejtx lill-poplu Ingliż fuq ix-xwiek. Int assolutament leġġenda.”
Fi tmiem it-tiġrija Hamilton tela’ bil-wieqfa fuq il-karozza biex jiċċelebra wara li rritorna fuq il-pits u mbagħad telaq jiġri jgħannaq lill-għarusa Nicole Scherzinger u l-familja, li marru għat-tiġrija biex jappoġġjawh.
Ir-rebħa ta’ Hamilton kienet il-11-il waħda dan l-istaġun meta mqabbla mal-ħamsa ta’ Rosberg. B’hekk finalment iż-żewġ sewwieqa tal-Mercedes irtiraw tliet darbiet kull wieħed dan l-istaġun u Hamilton ħareġ rebbieħ b’67 punt.
Dan kien ifisser li Hamilton rebaħ il-Kampjonat b’vantaġġ ta’ 67 punt u issa Hamilton laħaq lil Michael Schumacher u Sebastien Vettel bit-tieni l-ogħla numru ta’ rebħiet fi staġun waqt li din kienet it-33 rebħa fil-karriera u b’hekk tela’ quddiem ir-rivali kbir tiegħu Fernando Alonso fil-ħames post fil-lista ta’ kull żmien.
Il-Williams ippruvaw l-almu tagħhom biex jegħlbu lil Hamilton almenu fl-aħħar tiġrija meta ħarġu lil Felipe Massa fuq tyres super-soft għall-aħħar parti qasira tat-tiġrija meta kien fadal 12-il dawra.
Tmien dawriet mit-tmiem Massa resaq disa’ sekondi taħt Hamilton u kompla jnaqqas id-distakk imma Hamilton ikkontrolla l-pass tiegħu biex aċċerta li kellu biżżejjed vantaġġ biex jirbaħ.
Madankollu l-Williams xorta rnexxielhom għall-ewwel darba mill-2004 ikollhom żewġ karozzi fuq il-podju b’Valtteri Bottas itemm it-tielet quddiem Daniel Ricciardo tar-Red Bull li kellu tiġrija mill-aqwa biex temm ir-raba’ wara li beda mill-pit lane minħabba li r-Red Bull nstab li kellhom il-karozzi mhux skont ir-regolamenti wara l-kwalifiki.
Jenson Button ħa l-ħames post fuq McLaren f’dik li tidher li keinet l-aħħar tiġrija tal-karriera tiegħu hekk kif il-McLaren għadhom ma ħabbrux jekk hux se jkun hu jew Kavin Magnussen li se jsuqu ma’ Fernando Alonso s-sena d-dieħla.
Il-Force India temmew fis-sitta u s-eba’ post b’Nico Hulkenberg u Sergio Perez.
Sieħeb Ricciardo, Sebastien Vettel li wkoll beda mill-pit lane, temm fit-tmien post waqt li l-aħħar żewġ postijiet tal-punti ħaduhom il-Ferrari b’Alonso fl-aħħar tiġrija tiegħu mal-Ferrari u Kimi Raikkonen.
