L-isparatura tax-xufier tal-Ministru Mallia inqabdet minn żewġ nisa b’filmati fuq il-mobiles tagħhom. Dan joħroġ mill-inkjesta Maġisterjali li ssoktat fl-aħħar jiem, fejn jidher li l-argument bejn Sheehan u l-Iskoċċiż, kif ukoll l-isparatura innifisha, inqabdu bil-mobiles ta’ mara u t-tifla tagħha.
Il-ġurnal THE TIMES OF MALTA illum qed jiżvela li kien hemm raġel li prova javviċina liż-żewġ nisa biex jara dawn il-filmati. Iżda dan ir-raġel baqa’ ma ġiex identifikat.
Omm u bintha ffilmjaw l-isparatura li seħħet fil-Gżira
Qed jiġi rappurtat ukoll li n-nisa irrifjutaw li jgħaddu dawn il-filmati lil din il-persuna misterjuża.
Għalkemm il-filmati mhux ċari, jirriżulta li mill-filmati jinstemgħu sew it-tiri li ġew sparati lejn il-karozza tal-iskoċċiż.
