Minkejja l-ftaħir mill-Gvern dwar investiment qawwi fil-Kura tas-Saħħa, servizzi kruċjali bżonnjużi biex tingħata kura tant meħtieġa lill-pazjenti mhux qed jingħataw mill-Isptar Mater Dei bl-iskuża li m’hemmx biżejjed fondi. Minħabba dan, it-tmexxija tal-Isptar Mater Dei lanqas biss qed timpjega l-carers meħtieġa għal ma’ dawn il-pazjenti.
Fi stqarrija, l-Union tal-Infermiera u l-Qwiebel (MUMN) qalet li dan in-nuqqas ta’ carers meħtieġa jista’ jwassal ukoll għal pazjenti li jaħarbu mill-Isptar minħabba l-kundizzjoni li jkollhom. Għaldaqstant, għarrfet lill-Maġistrati u l-Ispetturi tal-Pulizija li la jiġri każ ta’ xi pazjent li jaħrab mill-Isptar, jew sfortunatament ikun hemm każ ta’ suwiċidju, l-ebda infermier m’għandu jinżamm responsabbli.
L-MUMN qalet li, minflok, għandha tkun it-tmexxija tal-Isptar Mater Dei li tiġi investigata minħabba n-nuqqas ta’ fil-carers meħtieġa. L-union sostniet li din il-problema ilha għaddejja minħabba t-tmexxija ħażina tal-Isptar, li saħansitra wasslet għal numru ta’ carers li qed jiġu mitfugħa fi swali mimlija żżejjed.
