FUTBOL: Roy Keane jħalli lil Aston Villa
L-assistant manager ta’ Aston Villa Roy Keane irtira mill-kariga b’effett immedjat. Keane, li hu wkoll assistant manager tat-tim nazzjonali tal-Irlanda qal li mhux qed ilaħħaq maż-żewġ karigi. Keane kien inħatar assistant tal-kowċ ta’ Villa Paul Lambert f’Lulju li għadda filwaqt li fl-istess ħin qed jgħin lil Martin O’Neill, kowċ nazzjonali tal-Irlanda.
F’kummenti li ta Keane qal li ma jkunx ġust fuq Villa li ma hu ma jagħtix il-massimu tiegħu minħabba li ma jkunx qed ilaħħaq mad-diversi impenji li għandu.
PELE – L-eks plejer leġġendarju tal-Brażil Pele jinsab f’kundizzjoni ‘stabbli’, jum wara li kien iddaħħal l-isptar minħabba infezjoni fil-bużżieqa tal-awrina. Aktar kmieni dan ix-xahar Pele kien ġie operat imma tard il-Ħamis filgħaxija kien iddaħħal b’urġenza l-isptar. Jidher li issa l-kundizzjoni tal-eks plejer ta’ Santos hi waħda tajba u mhux allarmanti.
NESTA – L-eks plejer internazzjonali Taljan Alessandro Nesta se jerġa’ jibda jilgħab il-futbol. Dan hekk kif Nesta, eks plejer ta’ Milan u Lazio se jingħaqad mat-tim Indjan ta’ Chennaiyin FC, tim li hu immexxi mill-plejer-kowċ Marco Materazzi. Ta min jiftakar li fl-Indja jilgħab anke l-eks captain ta’ Juventus Alessandro Del Piero u l-eks attakkant ta’ Juventus Trezeguet.
SHAQIRI – Il-President onorarju ta’ Bayern Munich Franz Beckenbauer żvela li f’Jannar li ġej Xherdan Shaqiri jista’ jħalli lill-klabb. Shaqiri, li għandu biss 23 sena lagħab biss tliet darbiet fil-Bundesliga u daħal erba’ darbiet bħala sostitut fiċ-Champions League. Shaqiri, li kien ingħaqad ma’ Bayern fl-2012 mingħand Basel hu segwit miċ-champions Taljani Juventus. Fis-sajf li għadda l-istess Shaqiri kellu wirjiet pożittivi mal-Iżvizzera fit-Tazza tad-Dinja.
VERMAELEN – Id-difensur ta’ Thomas Vermaelen mistenni jitlef il-kumplament tal-istaġun hekk kif dan se jkun operat fil-hamstring. Vermaelen ingħaqad ma’ Barcelona mingħand Arsenal fis-sajf li għadda għas-somma ta’ madwar 19-il miljun ewro u għadu ma lgħabx partita minħabba din l-injury. Jidher issa li l-plejer Belġjan se jitlef il-kumplament tal-istaġun.
