BASKETBALL: Illum waranofsinhar jintlagħbu l-preliminari mit-Tazza Louis Borg. Din it-tazza tintlagħab fuq żewġ legs bit-tieni leg programmati għal nhar it-Tnejn.
Athleta A to Z Electronics, Virtus Cynergi u Bupa Luxol jibdew favoriti li jiksbu post fis-semi-finali meta jmisshom kontra Pavi Depiro, Remax Siġġiewi Citadel u Mellieħa Mr Green respettivament.
Athleta mhux suppost li jsibu diffikultà jegħlbu lit-tim żagħżugħ ta’ Depiro. Athleta għandhom ferm aktar esperjenza minn Depiro u R. Vella, A. Aquilina u I. Tanti ‘għandhomx ifallu milli jagħtu dispjaċir ieħor lill-eks tim tagħhom.
Waqt li Athleta huma forsi l-aħjar tim biex idawru l-ballun fl-attakk, Depiro m’humiex konsistenti u l-entużjażmu kultant jiġri bihom.
Virtus, li għaddejjien minn forma tajba u flimkien ma’ Athleta wrew li għandhom materjal biex jiġġieldu għar-rebħ tal-unuri mhux suppost ifallu kontra Siġġiewi li qed jerġgħu jibnu t-tim wara li tilfu l-aħjar elementi tagħhom.
Wara li R. Muscat inħatar kowċ minflok K. Borg , Siġġiewi qed jittamaw li l-esperjenza tiegħu tgħinhom juru titjib u joffru sfida denja.
Luxol se jiltaqgħu kontra t-tim mit-Tieni Diviżjoni Mellieħa. Luxol, wara li tilfu minħabba sospensjoni twila, lill-playmaker veteran A. Borg u diversi plejers b’esperjenza għażlu li jħallu l-klabb, qed jerġgħu jibnu tim ibbażat fuq plejers tan-nursery tal-klabb. L-Amerikan tagħhomm O. Rutledge mistenni jagħmel ħafna ħsara lil Mellieħa li m’għandhomx plejer barrani professjonali.
Intant se jitkompla wkoll il-kampjonat St James Hospital tan-nisa u Hibs jibdew favoriti biex ikomplu jissieltu għall-ewwel postijiet kontra DHL Phoenix li m’għandhomx barranija waqt li t-tieni konfront bejn Pavi Depiro u Caffe Moak Luxol għandu jkunu bilanċjat bir-riżultat jiddependi minn episodji.
Mill-Kampjonat tal-irġiel tat-Tieni Diviżjoni SN Suns jibdew l-impenji tagħhom kontra Athleta li jistgħu jużaw liż-żgħażagħ M. Gauci Montanaro u M. Gouder għalkemm dawn jinżlu fuq il-bank mal-kbar.
Fit-tieni konfront Hibs, li għadhom bla telfa dan l-istaġun u wara s-suċċess fis-Shield mhux suppost ifallu milli jiksbu rebħa oħra kontra Starlites.
