Libjan li erba’ snin ilu kellu 40 sena, kellu imsarnu barra minn żaqqu wara li qala’ daqqa ta’ sikkina fi ġlieda li seħħet f’appartament fil-Marsa. Is-sikkina li ntużat f’din il-ġlieda baqgħet qatt ma nstabet.
Dan ħareġ mix-xhieda ta’ l-Ispettur Daniel Zammit waqt il-ġuri li beda l-Erbgħa filgħodu quddiem l-Imħallef Michael Mallia fil-konfront ta’ Noel Farrugia, ta’ 35 sena, mill-Marsa u li huwa magħruf bħala “Il-Giża”. Huwa qed jiġi mixli bl-attentat ta’ qtil ta’ Omar Faiz El Sallak, liema reat seħħ fi Triq it-Tiġrija fil-Marsa stess.
L-Ispettur Daniel Zammit qal li huwa kien infurmat mill-Isptar Mater Dei Hospital li kien hemm persuna mitluqa barra d-Dipartiment tal-Emerġenza.
“ Jien mort l-isptar u sibt il-vittma, raġel ta’ nazzjonalita’ Libjana u li dan kien ilu Malta għal diversi snin. Huwa kien fuq “stretcher” b’imsarnu barra. Għall-ewwel kien beda jsibha bi tqila li jkellimni, iżda wara qallu li kellu argument ma’ Noel “Il-Giża” fuq droga u fuq mara u li kien qala’ daqqa ta’ sikkina f’appartament fil-Marsa.
Ftit wara huwa ddaħħal biex jiġi operat u għalhekk jien u l-kollegi tiegħi morna l-Marsa nfittxu lil Farrugia,” qal l-Ispettur Zammit. Marru fl-appartament u sabu l-bieb imbexxaq. Dak il-ħin, qal l-Ispettur, irrealiżżaw li l-bieb kien għadu kemm jinħasel pero kien għad hemm xi qtar ta’ demm ma’ l-art, fuq il-“cupboard” tal-kċina u demm ma’ purtiera.
Il-Pulizija rnexxielha ssib lil Farrugia ftit tal-jiem wara l-inċident, bis-sikkina li ntużat fir-reat tibqa’ ma tinstab qatt. Meta kien interrogat jumejn wara l-inċident, Farrugia ammetta li kien hu li ta d-daqqa ta’ sikkina, iżda l-Avukat tiegħu Edward Gatt kien qal lill-Pulizija li l-klijent tiegħu kien ammetta l-akkużi minħbba li dak il-ħin li ta l-istqarrija kien taħt l-influwenza tad-droga, u ma kien jaf x’qiegħed jagħmel.
Farrugia kien qal lil Pulizija li el Sallak ried id-droga kokaina bla ħlas u kien għalhekk li qamet il-ġlieda. Xehed ukoll it-tabib Karl Refalo, li eżamina lil el Sallak , fil-lejl tal-inċident, u qal li huwa seta’ jara l-imsaren tal-Libjan imdendlin il-barra miż-żaqq.
Qal li din kienet ferita serja u kellu jiġi operat mill-ewwel. Noel Farrugia magħruf bħal “Il-Giża” qed jiġi akkużat li fit-22 ta’ Lulju tal-2010 fl-appartament tiegħu stess ta daqqa ta’ sikkina fuq Omar Faiz El Sallak.
Il-Libjan li llum għandu 44 sena, kien ittieħed l-isptar Mater Dei u tqiegħed fit-Taqsima tal-Kura Intensiva jiġġieled għal ħajtu. Huwa qed jiġi mixli wkoll li kellu fil-pusses tiegħu strument li jaqta’ bil-ponta waqt li wettaq ir-reat.
Għall-akkużat qegħdin jidhru l-Avukati Edward Gatt u Mark Vassallo filwaqt li l-Avukati Kevin Valletta u Vincienne Vella qegħdin imexxu l-Prosekuzzjoni f’isem l-Avukat Ġenerali.
