Betty Williams, anzjana ta’ 86 sena, irriservat kull mejda f’pub lokali sabiex persuni li jgħixu waħidhom ikunu jistgħu jgawdu ikla flimkien matul dan il-Milied.
L-armla u eks għalliema tal-iskola kriet pub sabiex issir ikla għal 50 persuna li qatt ma ltaqgħet magħhom qabel – bi spiża li mistennija tlaħħaq 1,000 Lira Sterlina – u dan sabiex ma jkomplux jaqgħu fis-solitudni.
Betty Williams, li tgħix f’West Hill fil-Lvant ta’ Devon, irriservat kull mejda f’The Lamb and Flag Pub f’Ottery St. Mary u se tkun hi li tħallas il-kont għal ikla dundjan u flixken tal-inbid.
Il-pensjonanta, li oriġinarjament kienet se żżomm l-identita’ tagħha mistura, tilfet lil żewġha 12-il sena ilu, u sabet ruħha waħidha, speċjalment fil-perijodu tal-Milied peress li fadlilha ftit qraba u ma tistax tivjaġġa.
U din is-sena, għax kienet determinata li ma terġax tiekol waħidha, kriet il-pub u estendiet invit miftuħ lil persuni li jgħixu waħidhom.
Williams, li ma kellhiex tfal, irċeviet donazzjonijiet ta’ aktar minn 1,000 ewro saħansitra mill-Istati Uniti u mill-Olanda. Dan wara li t-talba dwar is-suġġeriment tagħha daret mal-erbat irjieħ tad-dinja.
