L-FA Trophy għandha sponsor ġdid, il-kumpannija Taljana tal-immobiljari Attian Group. Dan ħabbru l-President tal-MFA Norman Darmanin Demajo fl-indirizz qasir tiegħu tal-bidu tas-sena l-ġdida waqt ir-riċeviment annwali organizzat mill-assoċjazzjoni li tmexxi l-futbol f’Malta ad unur l-isponsors u l-imsieħba tagħha.
Il-President tal-MFA qal li fil-jiem li ġejjin qabel jintlagħab ir-raba’ round tal-kompetizzjoni bejn l-20 u l-21 ta’ Jannar se jkunu qed jitħabbru aktar dettalji dwar dan.
Dan l-istaġun l-FA Trophy mingħajr sponsor wara li ma kienx imġedded il-ftehim mal-kumpannija Maltco li kienet tisponsorja l-kompetizzjoni permezz tal-U*Bet.
Darmanin Demajo semma kif din se tkun sena oħra impenjattiva għall-MFA u l-futbol Malti kemm fuq bażi lokali kif ukoll fix-xena internazzjonali fejn fost l-oħrajn semma l-elezzjoni tal-Presidenza tal-FIFA u l-Awards Annwali organizzati mill-istess MFA.
Darmanin Demajo qal li l-interess fil-futbol Malti hu kbir u dan jixduh ukoll in-numru ta’ programmi televiżivi kif ukoll il-kontroversji li jinqalgħu. Fuq nota umoristika wiegħed li jekk ma jkunx hemm kontroversji, l-MFA se tkun lesta li tara li toħloq il-kontroversja hi.
