Tal-anqas 12-il persuna nqatlu u sitta oħra ndarbu wara li żewġt irġiel armati daħlu fl-uffiċċju ta’ ġurnal satiriku Charlie Hebdo.
Il-ġurnal fil-passat kien mira ta’ kontroversja għaliex kien stampa karikaturi tal-Profeta Iżlamiku Mohammed.
* Jidher li fost il-vittmi hemm żewġ pulizija li kienu għassa mal-bini. Xhieda qed jgħidu wkoll li t-terroristi kienu qed ifittxu lil ġurnalisti isem isem qabel ma qatluhom.
* Il-vittmi issa telgħu għal 12
* Il-President Franċiż Francois Hollande qal li f’dawn l-aħħar ġranet kienu mxejna diversi attakki terroristiċi fi Franza.
* L-attakk seħħ meta kienet qed issir il-laqgħa editorjali, jiġifieri l-ġurnalisti kollha kienu preżenti, u apparti machine guns tat-tip Kalashnikovs, intuża wkoll rocket launcher.
* L-iskejjel f’Pariġi mhux se jħallu t-tfal imorru d-dar sakemm ikollhom il-kunsens mill-Pulizija.
* L-allert fi franza għall-forzi tas-sigurta hu l-ogħla li jista’ jkun u fit-toroq żdiedet il-prezenza tas-suldati ma’ postijiet ta’ qima, skejjel u postijiet pubbliċi.
* Fiamnetta Venner, li kienet taħdem f’Charlie Hebdo, fissret li l-ġurnalisti mar-rivista kienu qed jibżgħu li xi attakk bħal dan kien se jseħħ: “Il-ħbieb kollha li mietu, se nintegrawhom f’qalbna. Imma naħseb li dan il-każ qajjem nazzjon sħiħ, għax hi ġenerazzjoni ta’ artisti, ta’ ġurnalisti li mietu llum”.
* Il-politiku Franċiż Philip Cordery qal li l-liberta’ demokratika ġiet attakkata: “Mhux biss Franza, imma l-Ewropa kollha hi taħt xokk kbir għax b’dan l-attakk kodard, it-terroristi, għal darb’oħra, attakkaw wieħed mis-simboli importanti tal-liberta’ – il-liberta’ tal-istampa…u naħseb li hu importanti għad-demokratiċi kollha biex jingħaqdu u jiġġieldu lit-terroriżmu bil-qawwa kollha.”
* L-editur ta’ Charlie Hebdo, Stephane Charbonnier, magħruf bħala Charb, x’aktarx inqatel fl-attakk.
* Xhieda li kienu fil-post semgħu li l-irġiel armati kienu membri mill-grupp terroristiku, al-Qaeda.
* Il-cartoonist Daniż, Kurt Westergaard, li l-cartoon tiegħu dwar il-Profeta Muħammed kien deher f’Charlie Hebdo, qed jittama li “l-maġġoranza moderata tal-Musulmani” tikkundanna l-attakk.
* Id-direttur tal-ġurnal Le Monde, Gilles Van Kote, ikkundanna l-attakk, u qal: “Il-qtil li seħħ illum isaħħaħ biss it-twemmin tagħna li jkun aħjar li niġġieldu l-injoranza, l-intolleranza u l-fanatiżmu. Hu importanti aktar minn qabel li niftakru li l-liberta’ tal-istampa mhix negozjabbli.”
* Tliet cartoonists li nqatlu huma Jean Cabut, Bernard Verlhac u Georges Wolinski.
* Stephane Charbonnier, l-editur tar-rivista, u li x’aktarx inqatel fl-attakk, kien mhedded b’ħajtu fil-passat u kien qed jingħata protezzjoni mill-pulizija.
* Christianne Taubira, il-Ministru għall-Ġustizzja ta’ Franza, tirreaġixxi b’mod imbikkem ‘il barra mill-kwartieri ta’ Charlie Hebdo.
* Il-President Franċiż Francois Hollande jisħaq: “Qed inkunu mhedda għax aħna poplu ħieles”.
* Il-grupp ġurnalistiku Spanjol, Prisa, evakwa l-kwartieri tiegħu f’Madrid wara li rċieva pakkett suspettuż.
* Fl-Italja, il-Ministeru tal-Intern sejjaħ laqgħa tal-esperti sabiex tkun analizzata l-possibbilta’ ta’ theddid minn militanti wara l-attakk f’Pariġi.
* Jacques Myard, membru parlamentari Franċiż mal-partit tal-oppożizzjoni UMP, qal: “Konna nafu li kien se jiġri xi ħaġa. Is-servizzi tas-sigurta’ kienu jgħidulna, mhux jekk, imma meta u fejn. Nafu li qegħdin fi gwerra. Il-pajjiżi tal-Punent – bħar-Renju Unit, Franza, il-Ġermanja – ninsabu fi stat ta’ gwerra.”
* Anne Hidalgo, is-sindku ta’ Pariġi, ħarġet stqarrija fuq Facebook u kkundannat l-attakk u sejħet għal marċ lejn Pjazza Repubblika għada l-Ħamis. Hi kkummentat: “Inħoss sens ta’ biżgħa assoluta minn dan l-attakk…Irridu nirrispondu lejn dan l-att barbaru permezz tal-unjoni sagra madwar il-prinċipji tar-Repubblika.”
* Bernard Cazeneuve, il-Ministru għall-Intern Franċiż, bħalissa qed jagħmel stqarrija. Hu qal li l-awtoritajiet qed ifittxu tliet irġiel armati b’rabta mal-isparatura.
* Jyllands-Posten, il-ġurnal Daniż li ħoloq protesti f’uħud mill-pajjiżi Musulmani wara li ppubblika karikaturi tal-Profeta Muħammed, żied is-sigurta’ mal-kwartieri tiegħu wara l-attakk tal-lum.
* Il-President Amerikan Barack Obama kkundanna bil-qawwa kollha “din l-isparatura orribbli”.
* Il-President Obama offra l-għajnuna Amerikana “sabiex it-terroristi jinqabdu”.
* Il-Lega Għarbija u l-ogħla awtorita’ Musulmana kkundannaw l-attakk f’Pariġi.
* Residenti f’Pariġi ntalbu biex joħorġu llejla sa Place de la Republique b’turija ta’ solidarjeta’ mal-vittmi.
* Il-Vatikan ikkundanna dan l-attakk “orribbli”.
* Kelliem għall-Vatikan qal: “Dan hu att vjolenti ta’ min jistmerru għax hu attakk kontra n-nies kif ukoll kontra l-liberta’ tal-istampa.”
* Mustafa Akyol, kontributur f’ġurnal, qal: “Bħala Musulman, nikkundanna dan l-attakk kiefer fuq Charlie Hebdo; noffri l-kondoljanzi tiegħi lill-poplu Franċiż. L-“Islam” tal-qattiela mhux “l-Islam” tiegħi.
* Il-President Russu Vladimir Putin ikkundanna “dan ir-reat ċiniku” u offra l-kondoljanzi tiegħu lill-vittmi u l-familji tagħhom.
* It-trejdunjonisti f’Syndicat National des Journalistes iridu lin-newsrooms biex josservaw mument ta’ silenzju. Dwar l-attakk huma qalu: “Meta jinqatlu l-ġurnalisti, l-att isir sabiex il-professjoni tkun mhedda u tgħix fil-biża'”
Id-dettalji għadhom deħlin
