It-triq li mill-Istitut tal-Istudji Turistiċi (ITS) tagħti għall-Bajja San Ġorġ f’Paceville kellha tingħalaq għal xi ħin mit-traffiku minħabba ammont kbir ta’ diesel li gelgel mat-triq. L-ammont kbir ta’ diesel irriżulta minn sistema tal-lukanda Corinthia, li għal xi raġuni far id-diesel minnha.
Fil-post waslu membri tal-Pulizija mis-Sezzjoni tat-Traffiku biex jikkontrollaw it-traffiku, filwaqt li membri mid-Dipartiment tal-Protezzjoni Ċivili ħadu ħsieb jitfgħu r-ramel fuq id-diesel. Fortunatament, dan il-każ ma ssarraf fl-ebda inċident tat-traffiku.
