Fuq Facebook qed jixterdu filmati pornografiċi fuq profili ta’ numru kbir ta’ persuni. Imma attenti! Dan m’hu xejn ħlief dak li jissejjaħ bħala malware, jew tip ta’ virus.
Fl-aħħar jiem filfatt kienu ħafna l-persuni li fuq il-profil tagħhom fuq Facebook intortament spiċċaw b’dawn is-suppost filmati pornografiċi; minn persuni kwalunkwe sa politiċi u persuni rinomati oħra f’pajjiżna.
Agħar minn hekk, l-istampi grafiċi li juru dawn il-filmati qed jispiċċaw jarawhom ukoll tfal tħt l-eta.
Li jiġri hu li persuna li jkun ittentat mill-kurżita’ li jara dawn il-filmati, jagħfas fuq il-link u mingħajr ma jkollu l-ebda kontroll, jispiċċa jxerred dawn il-filmati fuq il-profili ta’ sħabu wkoll.
F’xi każi, min jagħfas fuq dawn il-links qed jintalab jagħfas share biex jara l-filmat sħiħ, jew inkella biex jinstalla xi programm. Dawn m’huma xejn ħlief tattiċi użati biex il-filmat ikompli jinxtered.
Fl-ewwel jumejn mindu beda dan il-malware fuq Facebook, hu rrapurtat li ġew affettwati mal-110,000 profil ta’ Facebook.
Din mhix l-ewwel darba li qed jinxterdu filmati b’tattiċi qarrieqa bħal dawn. Fl-2014 bdew jixterdu filmati taparsi minn Youtube, imma li fil-verita’ ma kienu xejn ħlief malware.
