Żebbuġi ta’ 63 sena ma nstabx ħati ta’ attentat ta’ qtil fuq raġel ieħor waqt ġlieda “free-for-all” f’Żebbuġ stess fl-2009. Il-Qorti emmnet il-verżjoni ta’ George Farrugia, dik li huwa kien qed jaġixxi b’mod li jiddefendi lilu nnifsu. Dan wara li kien ukoll qala’ daqqiet b’kanna tal-metall.
Farrugia ma nstabx ħati tal-attentat ta’ qtil ta’ George Saliba wara li tah daqqa ta’ sikkina waqt ġlieda bejn żewġ familji. Mill-provi li ħarġu quddiem il-Maġistrat Miriam Hayman ħareġ kif iż-żewġ familji kemm il-darba kienu nvoluti fi ‘ġliediet kbar u li teżisti mibgħeda kbira bejn iż-żewġ familji.
L-inċident kien seħħ għall-ħabta tas-7.15 p.m. fl-ewwel ta’ Lulju tal-2009 fi Triq Pawlu Debono wara argument li beda bejn il-familji fuq garaxx li jmiss mad-dar ta’ Farrugia, li kien qed ikun ta’ inkonvenjent għalih u għall-ġirien.
Ħareġ li sid il-garaxx ħebb għall-Farrugia, kif ukoll daħlu fl-istorja ċertu Saviour Camilleri u membri tal-familja tiegħu u Saliba nniffsu. Farrugia qal fil-Qorti li Saliba tah daqqa ta’ kanna filwaqt li Camilleri tah bis-sieq. Minħabba f’hekk George Farrugia sofra minn laċerazzjoni f’rasu u frattura fl-għadma ta’ dahru.
Farrugia qal li s-sikkina kien iħalliha fid-“drive-in” peress li kien juża’ għall-panti u ma kellux triq oħra ħlief jirrikorri għaliha għax beża’ għal ħajtu. Huwa qal ukoll li ilu jgħix f’infern għal 13-il sena sħaħ qabel dan l-inċident minħabba l-inkwiet fuq dan il-garaxx li kien qed jintuża minn Camilleri li kien jaħdem bħala mekkanik mingħajr il-permess tal-MEPA.
Il-ġirien kienu wkoll iffirmaw petizzjoni fuq dan ir-rigward. Il-Qorti qalet fis-sentenza tagħha li kien hemm verżjoni kontrastanti fuq l-inċident imsemmi, iżda skont l-esperti tal-Qorti, l-inċident seħħ viċin id-dar ta’ Farrugia, li jindika li Saliba u l-familja tiegħu l-ewwel ressqu lejn l-istess Farrugia.
Il-Maġistrat Hayman qalet li l-verżjoni mogħtija minn Saliba u l-familja tiegħu, inkluż dik ta’ Camilleri, ma tistax titwenmmen, u emmnet il-linja ta’ difiża ta’ Farrugia li kien qed jiddefendi lilu nnifsu biex ikun protett hu, l-familja tiegħu u l-propjeta’ tiegħu mill-agressjoni.
Il-Qorti talbet ukoll lill-Kummissarju tal-Pulizija biex jinvestiga dwar jekk il-garaxx li kien responsabbli għall-ġlieda u l-mibgħeda li hemm bejn il-familji, għandux permess li jopera. L-Ispetturi Daniel Zammit, Joseph Mercieca u Malcolm Bondin mexxew il-Prosekuzzjoni filwaqt li l-Avukat Joe Giglio deher għal Farrugia.
