Bejn is-6 u t-8 ta’ Marzu, 2015
Is-Società Filarmonica La Vittoria tal-Mellieħa għal sena oħra se torganizza l-Maratona Sportiva b’risq il-Fondazzjoni Puttinu Cares bejn il-Ġimgħa 6 u l-Ħadd 8 ta’ Marzu 2015.
Ġie mħejji programm b’diversi attivitajiet fosthom ikla fis-Sala tal-Bar tal-Każin, indoor games, carwash, parata mill-Iscouts tal-Mellieħa u tal-Qawra, wirja mis-sezzjoni tal-klieb tal-Pulizija, Fun Run mill-Mellieħa Athletics, wirja ta’ logħob ta’ Snooker minn rappreżentanza tas-Società Filarmonica La Vittoria, l-Għaqda Mużikali Imperial, Mellieħa Sports Club, Ċentru Laburista u Selmun Bar kif ukoll marċ mill-Banda La Vittoria.
Mis-Sibt 28 ta’ Frar sal-għeluq tal-Maratona il-Ħadd 8 ta’ Marzu fis-Swali 8 ta’ Settembru u Maria Bambina tal-istess Każin, tkun għaddejja wirja ta’ Mudelli ta’ Karozzi Kollettibli mis-Sinjuri Franco u Frankie Farrugia, Marco Gauci u Roderick Vella.
Is-Sibt 7 ta’ Marzu se jkun qiegħed jiġi organizzat 8 a side Tournament tal-futbol, bejn is-13.00 u l-17.00 fil-grawnd tal-futbol tal-Mellieħa bil-għajnuna tal-Mellieħa Sports Club, bl-għan sabiex jinġabru fondi għal din il-kawża ġusta.
Il-Ħadd 8 ta’ Marzu 2015 fid-9.00a.m. ser issir ride ta’ karozzi minn Ta’ Qali sal-Pjazza tal-Parroċċa bis-sehem tal-Mini Club Malta, Old Motors Club, Ford Club u Volkswagon Club, fejn imbagħad bejn id-9.30a.m. u 12.00p.m. dawn l-istess karozzi ser ikunu qed jiġu esebiti fl-istess pjazza. Il-Maratona tiġi fi tmiemha permezz ta’ esebizzjoni ta’ logħob ta’ Snooker mill-player professjonali Mellieħi u Champion ta’ Malta Alex Borg flimkien ma’ Duncan Bezzina.
L-organizzaturi tal-attivita’ iħeġġu lill-pubbliku sabiex jikkontribwixxi, jattendi u jżur il-Mellieħa f’dawn il-jiem ta’ maratona. Permezz tad-donazzjoni tagħkom tkunu qed tgħinu lil Puttinu Cares, tkompli twettaq il-ħidma tagħha b’risq dawk kollha li għandhom bżonn l-għajnuna.
