Il-Pulizija qed tinvestiga lid-DJ Joel Caruana wara li dan is-sit għall-aħħar ġimgħat ippublika serje ta’ stejjer u akkużi ġodda li saru fil-konfront tiegħu.
F’risposta għal mistoqsijiet li bagħat dan is-sit lill-Korp tal-Pulizija, ġejna nfurmati li “l-Pulizija qed taħdem fuq dawn l-allegazzjonijiet ġodda.”
“Binti, u tfajliet oħra taħt l-età li d-DJ Joel Caruana poġġa fuq posters biex jirriklama l-parties tiegħu qatt ma tawh permess jagħmel dan,” qalet din l-omm f’kummenti lil Maltarightnow.com.
Kif irrapurtat minn dan is-sit, l-omm irrapurtat dan il-każ lill-Pulizija mis-sezzjoni tas-Cyber Crime Unit, lill-Kummissarju tat-Tfal kif ukoll lill-Uffiċċjali tal-Protezzjoni tad-Data. Dan għaliex qed tallega li d-DJ qabad u ħa r-ritratti ta’ bintha, u tfajliet oħra taħt l-eta’ minn fuq Facebook.
Imma l-akkużi kontra Joel Caruana ma jiqfux hawn. Dan hekk kif Maltarightnow żvela wkoll kummenti li saru fuq Facebook minn tfajla taħt l-eta’ li allegat li minkejja li kienet taħt l-eta’, Joel Caruana pprova jkollu x’jaqsam magħha kontra r-rieda tagħha.
Skont din it-tfajla, Joel Caruana kien talabha tidħol miegħu fl-uffiċċju tiegħu u saqsiha kemm trid flus biex ikollu x’jaqsam magħha. Imma meta rreżistiet, Joel insista u pprova jneżżahha, għalkemm hi tatu daqqa ta’ ħarta biex waqqfitu mill-avvanzi tiegħu.
Barra minn hekk DJ ieħor f’kumment li tefa’ fuq Facebook staqsa għaliex DJ Joel neħħa xi kummenti li kiteb u qal hekk: “Jaqaw xi ħadd minn fost sħabi għandu bżonn isir jaf xi ħaġa dwarek? Forsi li ddrugajtlu lil oħtu biex tieħu vantaġġ minnha?”
Jekk Joel Caruana jinstab ħati ta’ dawn l-akkużi, din tkun it-tielet darba li dan id-DJ jrid jiddefendi ruħu quddiem il-Qorti.
Dan wara li lura fl-2010, Joel Caruana ngħata sentenza sospiża mill-Qorti għax nstab li kellu x’jaqsam sesswalment ma’ tifla ta’ 13-il sena waqt li fl-2013 kien ammetta wkoll li kellu x’jaqsam ma’ din it-tfajla taħt l-eta’ u li kien offenda l-morali pubbliċi wara li kien deher f’ritratt jaqbad sider tfajla taħt l-eta’.
