Tliet Rumeni ngħataw sentenza sospiża mill-Maġistrat Neville Camilleri wara li ammettew li wettqu numru ta’ serqiet bejn it-13 u l-21 ta’ Marzu li għaddew. Teodor Iulian Mancea, ta’ 24 sena, Iulian Chermenschi, ta’ 28 sena, u Barbu Costica, ta’ 36 sena, ammettew li s-Sibt li għadda serqu diversi fwejjaħ għad-dannu ta’ Alkida Rama mill-ħanut Roseberry, li jinsab fil-Belt.
Ir-Rumeni ammettew ukoll li fit-13 ta’ Marzu, għall-ħabta tal-4.25pm, serqu xi fwieħa mill-El Medina Pharmacy fil-Qawra għad-dannu ta’ Philip Muscat. Ftit wara li saret is-serqa, Muscat ippubblika filmat tas-CCTV fuq il-mezzi soċjali, fejn talab l-għajnuna tal-pubbliku biex il-persuni jiġu identifikati.
Mancea ammetta wkoll li fis-17 ta’ Marzu, għall-ħabta tat-7.45pm, seraq mobile għad-dannu ta’ Luanne Galea. Mancea ġie kkundannat sentejn ħabs sospiżi għal erba’ snin, filwaqt li Chermenschi u Costica kienu kkundannati għal 18-il xhar ħabs sospiżi għal tliet snin.
L-Ispettur Priscilla Caruana mexxiet il-Prosekuzzjoni, filwaqt li l-Avukat Robert Montalto deher għal Costica u l-Avukat Noel Bartolo deher għal Mancea u Chermenschi.
