Barrani sofra ġrieħi ħfief f’wiċċu wara li skont hu qala’ daqqa ta’ flixkun f’rasu għax kien qed jiġbed filmat ta’ ġlieda permezz tal-mobile tiegħu.
Il-każ seħħ il-Ħadd għall-ħabta tas-19:30 meta żviluppat ġlieda bejn xi Maltin u barranin f’ħanut tax-xorb Triq il-Ħatab, f’San Pawl il-Baħar.
Il-barrani li qala’ d-daqqa ta’ flixkun ma kellux x’jaqsam mal-argument imma rraporta lill-Pulizija li safa’ aggredit mis-sid tal-ħanut fejn seħħet il-ġlieda. Skont hu dan seħħ minħabba l-filmat li kien qed jiġbed.
Jirriżulta li qabel qala’ x-xebgħa, mart is-sid tal-ħanut kienet anke’ ħaditlu l-mobile.
Bil-każ ġew infurmati l-Pulizija tal-Qawra, li mgħejuna mill-uffiċjali tar-Rapid Intervention Unit waslu fil-post u sar magħruf li kollox beda meta grupp ta’ barranin li kienu fil-ħanut tad-divertiment ħebbew għal żewġ Serbi.
Malli ndunaw b’dak li kien qed iseħħ, żewġ Serbi oħra niżlu minn appartament fil-qrib u komplew fil-ġlieda. Il-ġlieda bdiet teskala, bil-barranin jikkawżaw ħsara fil-ħanut tax-xorb qabel spiċċaw jiġġieldu fit-triq.
Sid il-ħanut qed jinżamm arrestat imma ċaħad li qatt ta’ daqqa ta’ flixkun lill-barrani. Hu allega li l-barrani sar agressiv meta martu ħaditlu l-mobile u qaltlu biex ma jibqax jiġbed il-filmat tal-ġlieda. Kompla li l-barrani sar agressiv anke’ fil-konfront tiegħu wkoll.
Skont il-verżjoni ta’ sid il-ħanut, meta r-raġel resaq lejh biex jipprova jħebb għalih, hu mbuttah bil-konsegwenza li dan waqa’ u ġie fuq il-ħġieġ li kien hemm fl-art.
Is-sidien tal-ħanut komplew li fil-post bdew jaslu wkoll vetturi mimlija persuni oħra ta’ karnaġġjon skur tant li s-sidien beżgħu u daħlu jissakkru fil-ħanut sakemm waslu l-Pulizija.
Jirriżulta li f’xi ħinijiet din il-ġlieda tant kibret u nvolviet nies li fil-post kien hemm mal-20 persuna, kważi kollha barranin.
