L-ikbar fenek tad-dinja, Darius, probabbli li dalwaqt se jiffaċċja l-kompetizzjoni … minn ħadd ħlief minn ibnu Jeff.
Darius hu twil 1.34 ta’ metru u jiżen iktar minn 22 kilogramma. Uffiċjalment hu meqjus bħala l-ikbar fenek fid-dinja. Imma fil-qrib probabbli se jkun qed jiffaċċja sfida diretta għat-tilu mingħand ibnu Jeff, li fadallu mas-sitt xhur oħra biex jikber, u li diġà hu twil 1.16 metru.
Lil sidthom, Annette Edwards li tgħix f’Worcestershire fl-Ingilterra, jiswewha mal-£5,000 fis-sena hekk kif jieklu mal-2,000 karrotta u mas-700 tuffieħa fis-sena. Jieklu wkoll ikel speċjalizzat għall-fniek kuljum u qatta’ tiben fil-ġimgħa.
Annette Edwards stqarret li għalkemm iż-żewġt ifniek huma enormi, huma l-aħjar annimali li setgħet tixtieq.
Iddeskriviethom bħala żewġt ifniek trankwilli ħafna, li jħobbu l-attenzjoni u li jmorru tajjeb ħafna mat-tfal.
Darius u Jeff jgħixu fil-ġnien ta’ Annette Edwards imma tant huma kbar li kellha tħejjilhom basket kbir, fil-forma ta’ qoffa, li normalment jintużaw minn klieb kbar.
