Għal darba, l-irkoppa rebħet lill-“imbattibbli” James Bond hekk kif l-attur Daniel Craig, li qed jinterpreta r-rwol prinċipali għar-raba’ darba fil-film Spectre, spiċċa kellu jiġi operat matul dawn il-btajjel tal-Għid.
Craig spiċċa biex weġġa’ rkopptu waqt il-ġbid tal-aħħar film 007, f’xena partikolari ta’ ġlied. Mill-Messiku, fejn kien għaddej il-ġbid, Daniel Craig irritorna fi New York fejn għamel intervent żgħir. Mistenni lura fuq is-sett tal-film fit-22 t’April.
Kelliem għal Eon Productions ippreċiża li Craig weġġa’ b’mod ħafif u li l-operazzjoni żgħira ma waqqfitx il-ġbid tal-film.
Il-ġbid tal-film Spectre bdew fl-istudios ta’ Pinewood fl-Ingilterra f’Diċembru li għadda. Iktar tard, il-kast u l-crew ittrasferew irwieħhom f’Ruma fejn inġibdu xi xeni u fejn l-attur spiċċa anke biex ħabat rasu, b’xorti tajba mingħajr konsegwenzi koroh. Fl-aħħarnett, il-produzzjoni marret il-Messiku minn fejn imbagħad mistennija tittrasferixxi ruħha mill-ġdid fl-Ingilterra.
Din hi r-raba’ darba li Craig jinterpreta r-rwol prinċipali tal-aġent sigriet tas-Sovran tal-Ingilterra. L-aħħar film tiegħu, Skyfall (2012) kien suċċess kbir fis-swali taċ-ċinema madwar id-dinja u daħħal iktar minn biljun dollaru fi flus. Spectre mistenni jinħareġ fis-6 ta’ Novembru.
