Intlaqa’ b’entużjażmu kbir, b’ċapċip u għajjat, it-trailer uffiċjali tas-seba’ edizzjoni tal-film Star Wars f’dik li tissejjaħ “Star Wars Celebration”.
L-impressjoni ferm pożittiva nħasset ukoll minn miljuni ta’ dilettanti li fl-aħħar ħin setgħu jaraw it-trailer fuq l-internet.
Il-film Star Wars: Episode VII – The Force Awakens mistenni joħroġ fis-swali taċ-ċinema madwar id-dinja mis-16 ta’ Diċembru.
It-tliet atturi ġodda tal-film, dirett minn J.J. Abrams, kienu preżenti għat-tnedija tat-trailer flimkien mal-atturi veterani ħlief għal Harrison Ford li kellu inċident b’ajruplan żgħir ix-xahar li għadda.
Skont Abrams, li dderieġa films bħal Star Trek u Lost, u li minn dejjem kien iħobb is-serje ta’ Star Wars, l-opportunità li ngħatatlu tegħleb ir-riskji u qatt ma ħa gost jaħdem daqs fuq dan il-film. Fil-fatt, Abrams insista li jinżammu elementi tas-sett ċinematografiku oriġinali minflok l-użu ta’ grafika fil-film u d-deżert li jidher fit-trailer hu fil-fatt fl-Emirati Għarab Magħquda.
