Il-manager ta’ Chelsea Jose Mourinho qabel verbalment li jġedded il-kuntratt mal-Blues għal sentejn oħra. Dan kien rappurtat fil-media Ingliża illum.
Mourinho li għandu 52 sena rritorna ma’ Chelsea fl-2013 fuq kuntratt ta’ erba’ snin u dan l-istaġun mexxa lill-klabb lejn ir-rebħ tal-Kampjonat Premier, l-ewwel wieħed sa mill-2010, u l-League Cup.
Fl-ewwel esperjenza tiegħu fi Stamford Bridge bejn l-2004 u l-2007, hu rebaħ żewġ kampjonati fl-2005 u l-2006 kif ukoll żewġ League Cups u FA Cup.
Mourinho li diġà hu l-aktar manager imħallas fl-Ingilterra fejn hu rappurtat li għandu salarju ta’ £8.4 miljuni, qed ikun rappurtat li bil-ftehim il-ġdid se jitla’ għal £10.5 miljuni.
Wara s-suċċess kontra Crystal Palace il-Ħadd fejn Chelsea aċċertaw it-titlu b’rebħa 1-0, Mourinho kien qal li lest jibqa’ ma’ Chelsea kemm irid il-proprjetarju Roman Abramovich.
Bayern iridu lil Verratti
Skont il-ġurnal Ġermaniż Bild, Bayern Munich jidhru nteressati fil-midfielder Taljan ta’ 22 sena ta’ Paris Saint Germain Marco Verratti li iżda għalih hemm interess qawwi minn diversi klabbs oħra, fosthom anke Barcelona, Real Madrid u Juventus.
Jidher li Bayern qed jaħsbu għall-futur biex ikollhom plejer żgħir flok Xabi Alonso, Schweinsteiger u Lahm u diġà kellmu lill-plejer, xi ħaġa li PSG ma tantx ħadu gost biha.
Kien rappurta tli Bayern lesti li joffru €30 miljuni għal Verratti.
