Immaġina tiret bi kważi nofs miljun ewro imma f’munita li m’għadhiex valida!
Hekk ġralhom il-werrieta Taljani ta’ koppja Taljana li kellha dar f’Malta, li fetħuha biss qrib il-Milied li għadda u li fis-safe tad-dar sabu bi kważi biljun Lira Taljana li llum m’għadha tiswa xejn.
Żvela dan il-Giornale di Vicenza fejn spjega li l-werrieta tal-koppja Bruno u Santina Antoniazzi ma jistgħux jemmnu x’ċajta goffa lagħbilhom id-destin. Il-koppja Antoniazzi, li t-tnejn mietu ftit snin ilu, ma kellhomx ulied. Wara mewthom, ġidhom, inkluż dar f’Malta, inqasam fost oħt ir-raġel u xi qraba oħra.
Id-dar f’Malta spiċċat f’idejn oħt Bruno Antoniazzi li madankollu ma fetħithiex għal snin twal. Meta qrib il-Milied li għadda, kuġin ta’ din il-mara offra li jmur jara d-dar f’liema kundizzjoni kienet, bit-tama li jbiegħuha, fetaħ is-safe u sab imgeddsa kważi biljun Lira Taljana.
Iżda minħabba li l-Italja ilha li qalbet għall-ewro iktar minn 10 snin, il-banek Maltin ma jistgħux isarrfu t-teżor fil-munita tal-lum. L-unika istituzzjoni li kapaċi tagħmel dan hu l-Bank Ċentrali tal-Italja imma jifdal problema oħra…dik li dak l-ammont kollu ta’ flus kontanti ma jistax joħroġ minn Malta.
Sadanittant il-flus spiċċaw f’safe ieħor sakemm forsi tinstab soluzzjoni għad-dilemma.
