Mix-xitwa li ġejja, Ryanair se jkollha żewġ rotot ġodda, minn Malta għal Ruma u minn Malta għal East Midlands fir-Renju Unit.
Il-linja tal-ajru low-cost ħabbret dan illum hekk kif, biex tiċċelebra l-aħbar, allokat 100,000 biljett għal destinazzjonijiet Ewropej, li qed tbiegħ bil-prezz ta’ €19.99. Dawn iridu jinxtaw sa nofsillejl tat-Tnejn li ġej u huma validi għal titjiriet f’Ġunju.
Bir-rotot il-ġodda, Ryanair qalet li se jkollha 22 rotta minn u lejn Malta li huma mistennija jġorru 1,100,000 passiġġier fis-sena u jikkontribwixxu għal 1,100 impjieg.
It-titjiriet lejn Ruma se jibdew mill-25 t’Ottubru b’titjiriet ħames darbiet fil-ġimgħa.
Fl-iskeda tax-xitwa se żżid ukoll iktar titjiriet lejn Madrid, li se jitilgħu għal minn tnejn sa tlieta fil-ġimgħa.
Ryanair fakkret li l-passiġġieri li jużaw is-servizzi tagħha jistgħu jagħżlu l-post fejn joqgħodu fuq l-ajruplan, iġorru t-tieni basket, igawdu minn inqas tariffi u minn sit elettroniku ġdid. Ħarġet ukoll app ġdida li tinkludi boarding passes għat-telefons ċellulari, u servizzi oħra għall-familja u għal dawk li jivvjaġġaw fuq xogħol.
