Sewwieq ta’ mutur jinsab fil-periklu li jitlef ħajtu wara li dalgħodu ħabat ma’ ħajt bil-mutur fil-Fgura.
L-inċident seħħ għall-ħabta tad-9.30am meta r-raġel, ta’ 33 sena mill-Fgura stess, kien qed idur bejn Triq il-Merħba u Triq is-Sur. Għal xi raġuni hu tilef il-kontroll tal-mutur u ħabat mal-ħajt.
Fil-post waslu l-Pulizija u tim mediku mill-Isptar Mater Dei, li ħadu lir-raġel l-Isptar għall-kura. Hemm hu kien iċċertifikat li jinsab fil-periklu li jitlef ħajtu u qed jinżamm fit-Taqsima tal-Kura Intensiva.
Il-Pulizija għadha qed tinvestiga l-każ, b’aktar stħarriġ qed jitmexxew mill-Pulizija tad-Distrett.
