Hemm nies fid-dinja li huma ffissati fuq il-ħwejjeġ ta’ Kimye jew fuq xofftejn Kylie. Hemm imbagħad oħrajn li ma jifilħux jisimgħu jew jaraw iktar dwar il-familja Kardashian.
Jekk int fost dawn tal-aħħar, estensjoni għall-browser li qed tinħoloq apposta se tgħinek biex timblokka l-kontenut kollu fuq l-internet dwar il-familja Kardashian.
Bl-isem “KardBlock”, din l-estensjoni telimina kull traċċa ta’ din il-familja minn paġni fuq l-internet u saħansitra min-Newsfeeds ta’ midja soċjali.
Il-programm, li bħalissa qed jiġi ttestjat, inħoloq mill-kumpanija ta’ midja soċjali f’Kalifornja, Chameleon.la u minn James Samshi, li stqarr li llum il-ġurnata ħafna nies ma jimpurtahomx x’jagħmlu l-membri tal-familja Kardashian u li wara din il-familja, il-proġett li jmiss se jelimina l-kontenut fuq l-internet ta’ Justin Bieber.
Din mhix l-ewwel darba li xi ħadd ipprova joħloq filter li jimblokka lill-familja Kardashian. Ħames snin ilu, plug-in għall-browser Chrome wiegħed li jelimina personalitajiet li dak li jkun jippreferi ma jismax dwarhom fuq l-internet.
