“Qalb daqshekk tajba bħalma kellek int għandha tkun ukoll b’saħħitha. Nisperaw li narawk lura f’saħħtek kemm jista’ jkun malajr.”
Kien dan wieħed mill-messaġġi ta’ kuraġġ li mijiet kitbu lil Raymond Falzon, magħruf bħala “is-Slais”, persuna rispettat u maħbub ħafna fir-Rabat.
Raymond sfortunatament kien involut f’inċident tat-traffiku fi Triq Buqana, fir-Rabat, ftit biss bogħod minn fejn joqgħod. Hu kien riekeb il-mutur tiegħu li tant kien għal qalbu, meta għall-ħabta tas-13:00 kellu impatt ma’ vann Mazda, misjuq minn raġel ta’ 69 sena mill-Mosta, li kiser fuq ġenb biex jidħol għall-għalqa tiegħu.
Mal-impatt Raymond, li lejliet l-inċident ikrah kien għadu kif iċċelebra għeluq sninu, tar minn fuq il-mutur, inqabad mat-trakk u tkaxkar għal xi metri. Raymond ittieħed immedjatament lejn l-isptar Mater Dei fejn ġie ċċertifikat li jinsab fil-periklu tal-mewt.
Fuq Facebook fost l-oħrajn jispikkaw il-messaġġi minn membri tal-familja, li ddeskrivew lil Raymond bħala pilastru tal-familja li mhux biss kien mimli kuraġġ imma kien jagħmel ukoll kuraġġ lil ta’ madwaru. Persuna ferrieħi li dejjem kien ifittex li jgħin lil ħaddieħor.
