Hemm tħassib fl-Olanda dwar l-oġġett misterjuż li deher f’ritratti ta’ dilettant tal-ambjent li ftit jiem ilu ħareġ biex jiġbed ritratti tal-maltemp fi Groningen għall-blogg tiegħu.
Harry Perton baqa’ mmeraviljat meta fir-ritratti deher oġġett li ħafna qed iqisu bħala UFO.
Perton qal li waqt li kien qed jieħu r-ritratti ra leħħa qawwija. Għall-bidu ħaseb li kienet il-flash tal-kamera tar-ritratti imma mbagħad induna li din kienet mitfija. Kabbar ir-ritratti li ħa u ra oġġett misterjuż, ta’ lewn aħdar ċar jixhel, fil-forma ta’ brama fl-ajru.
Minn meta poġġa r-ritratt li ħa fuq l-internet, ħafna kienu dawk li kkummentawlu. Perton sostna li hu ma jemminx fil-UFO u li probabbli hemm spjegazzjoni marbuta mal-kundizzjonijiet tat-temp dak il-ħin.
