Il-Kummissarju ta’ kontra l-Iskjavitu’ fl-Ingilterra qal li fit-toroq ta’ Londra qed jiżdiedu xeni bħal tal-film jew ktieb ta’ Oliver Twist, bi klikek ta’ tfal jisirqu jew jittallbu.
Kevin Hyland akkuża lil ġenituri li uliedhom qed ikunu fit-toroq iwettqu reati minflok imorru l-iskola. Insista li fir-Renju Unit, il-liġijiet kontra l-iskjavitu’ għadhom ’il bogħod milli jkunu kif mixtieqa u li qed jiżdiedu l-każijiet ta’ tfal li jisirqu minn ħwienet jew mill-basktijiet ta’ nies li jkunu mexjin fit-toroq. Kien hemm rapporti wkoll ta’ tfal etniċi Roma li kienu qed jintużaw bħala ħallelin f’dawk li, Hyland iddeskriva bħala, serqiet bħal ta’ Fagin.
Is-sena li għaddiet kien hemm 151 sentenza dwar l-iskjavitu’, li tista’ tinkludi l-esplojtazzjoni sesswali, xogħol furzat, skjavitu’ fid-dar jew kriminalità mġiegħla.
Hyland qal li l-isfruttament sesswali waħdu kapaċi jagħti ritorn għoli ħafna lil min iġiegħel lil ħaddieħor jagħmlu, u f’sena dan jista’ jaqla’ mal-miljun lira Sterlina jekk iħaddem għaxar nisa. Semma li każijiet ta’ xogħol furzat kapaċi jwassal għal qligħ ta’ mijiet ta’ eluf fix-xahar lil min iġiegħel lil ħaddieħor jagħmlu.
F’Diċembru, il-Ministeru tal-Intern fir-Renju Unit ippubblika ċifra li tistma li hemm bejn 10,000 u 13,000 li potenzjalment huma vittmi ta’ skjavitu’ fil-pajjiż. Dawn jinkludu nisa mġiegħla jsiru prostituti jew jiżżewġu, ħaddiema domestiċi u dawk fl-għelieqi, ħaddiema ta’ fabbriki u dawk fuq bastimenti tas-sajd.
