Il-politiku Britanniku Charles Kennedy, li ftit tas-snin ilu kien imexxi l-Partit Liberali Demokratiku, miet fid-dar tiegħu f’Fort William, fl-Iskozja. Hu kellu 55 sena. Filwaqt li l-kawża tal-mewt mhix magħrufa, il-Pulizija Britannika mhix tittratta l-każ bħala wieħed suspettuż.
Kennedy kien mexxa l-Partit Liberali Demokratiku mill-1999 sal-2006 iżda ma kienx elett fl-elezzjoni ġenerali tax-xahar li għadda fir-Renju Unit. Fl-2005, Kennedy kien kiseb l-aqwa riżultat elettorali għal-Lib Dems wara li sentejn qabel kien oppona bis-sħiħ l-intervent tar-Renju Unit fil-Gwerra tal-Iraq.
Madankollu, hu rriżenja fl-2006 wara li żvela li kien qed jieħu l-kura għal problema antika li kienet relatata mal-alkoħol.
Il-Prim Ministru Britanniku David Cameron u Nick Clegg, il-Kap attwali tal-Liberali Demokratiċi, kienu fost l-ewwel li raddew ġieħ lill-memorja ta’ Kennedy.
