Il-President tal-FIFA Sepp Blatter sejjaħ kungress straordinarju li matulu se ssir elezzjoni ġdida biex jinħatar is-suċċessur tiegħu.
Fi stqarrija Blatter, li ġie elett f’elezzjoni tal-FIFA erbat ijiem biss ilu, qal li l-mandat tiegħu jidher li mhux appoġġjat minn kulħadd.
Fl-ewwel reazzjoni tiegħu lil dan is-sit, il-President tal-Malta Football Association Norman Darmain Demajo qal: “Ninsabu sorpriżi imma kuntenti li d-dinja tal-futbol se jkollha kap ġdid, kif għandu jkun. Naħseb li Blatter irrealizza li mbilli rebaħ il-vot ta’ dik il-kamra hemm affarijiet li għadna ma nafux.”
Filwaqt li għamilha ċara li għadu kmieni, kompla li “wieħed irid jara għala Blatter irriżenja, x’ġara u nbidel fl-aħħar sigħat li wasslu biex tittieħed din id-deċiżjoni.”
Iktar kmieni Sepp Blatter sejjaħ għal konferenza tal-aħbarijiet fejn ħabbar ir-riżenja tiegħu: “Qed insejjaħ kungress straordinarju biex jinstab is-suċċessur tiegħi. Mhux se nipparteċipa fl-elezzjoni imma se nkun f’pożizzjoni biex niffoka fuq riformi profondi. Għal snin sejjaħna għal riforma, imma dan ma kienx suffiċenti,” qal Blatter.
Fl-ewwel kummenti tiegħu, Blatter qal li ħa din id-deċiżjoni għaliex l-aqwa interessi tal-FIFA huma għal qalbu.
