Internazzjonali

Sturgeon twissi dwar ir-reazzjoni Skoċċiża fil-kwistjoni tar-referendum

Il-Ministru Ewlieni tal-Iskozja, Nicola Sturgeon, wissiet dwar ‘ir-reazzjoni qawwija’ f’każ li l-Iskozja tispiċċa barra mill-Unjoni Ewropea bħala riżultat tar-referendum nazzjonali li għandu jiddeċiedi l-futur tar-Renju Unit.

Sturgeon, li tmexxi l-iScottish National Party (SNP), għamlet diskors fi Brussell u matulu qalet li l-vot biex ir-Renju Unit ma jiffurmax aktar parti mill-UE kkaġuna għadab kbir fl-Iskozja. Dan wara li l-Prim Ministru Britanniku, David Cameron, wiegħed ir-referendum dwar il-futur tar-Renju Unit fl-UE, u hu, fl-aħħar jiem, iddiskuta mal-mexxejja Ewropej rigward kwistjonijiet speċifiċi ta’ riforma fl-Unjoni.

Intant, Sturgeon qalet li l-Iskozja għandha ħafna x’toffri lill-UE u għandha wkoll ħafna x’titgħallem mill-eżempju tal-istati membri ż-żgħar tal-Unjoni.

Fid-diskors tagħha – li kien l-ewwel wieħed lill-UE bħala Ministru Ewlieni tal-Iskozja – Sturgeon appellat biex Cameron jaqbel rigward il-kwistjoni tad-‘double majority’, li tfisser li l-erba’ pajjiżi tar-Renju Unit (l-Ingilterra, l-Iskozja, Wales u l-Irlanda ta’ Fuq ) iridu jaqblu kollha dwar il-ħruġ mill-UE qabel dan isir possibbli.

Hi kompliet li jistgħu jsiru l-bidliet pożittivi mit-trattat tal-UE eżistenti waqt li ħeġġet biex l-Unjoni tikkonċentra fuq l-oqsma fejn il-proġetti tax-xogħol konġunti u l-kooperazzjoni jagħmlu differenza importanti fil-ħajja taċ-ċittadini Ewropej.