Anthony Blinken, id-Deputat Segretarju tal-Istat Amerikan, qal li minn mindu disa’ xhur ilu bdiet il-kampanja ta’ attakki mill-ajru kontra l-ISIS fis-Sirja u l-Iraq, hu stmat li aktar minn 10,000 ġellied tal-grupp inqatlu u dan fil-ġejjieni qrib kien se jħalli l-impatt tiegħu fuq il-grupp.
Hu qal dan wara taħditiet ma’ mexxejja minn aktar minn 20 pajjiż li ltaqgħu f’Pariġi, fi Franza, biex jiddiskutu x’għandu jsir fil-konfront tal-ISIS. Blinken qal li kien sar proġress kbir fil-ġlied kontra l-ISIS imma dawn kien għadhom forza qawwija u l-ġlieda kontrihom se tieħu s-snin.
Blinken fakkar li meta nħolqot il-koalizzjoni, kien tfassal pjan mifrux fuq tliet snin u minn dawn it-tliet snin s’issa kienu għaddew biss disa’ xhur li fihom inqatlu madwar 10,000 ġellied tal-ISIS.
Il-laqgħa saret hekk kif fl-Iraq, l-ISIS kisbu l-akbar rebħa militari f’sena meta ħadu l-kontroll ta’ Ramadi. Dan fost kritika kbira tal-militar Iraqi li jidher li mhux kapaċi jikkonfronta lill-ISIS waħdu. Il-belt ta’ Ramadi hi biss 90 kilometru bogħod minn Bagdad u issa hemm tħassib li l-ISIS jista’ jipprova javvanza lejn il-belt kapitali tal-Iraq.
