Qassisin nisa fi ħdan il-Knisja Anglikana jridu li jinbidel il-lingwaġġ użat f’servizzi reliġjużi biex Alla jibda jiġi riferut fil-femminil.
Kritiċi għall-proposta ta’ dan il-grupp ta’ qassisin nisa qed jisħqu li dak li jridu dawn in-nisa hu ‘korrettezza politika’ meħuda f’estrem iżda dawn qed jinsistu li b’hekk jiġi miġġieled lingwaġġ sessist.
L-eks-Membru Parlamentari Konservattiva Ann Widdecombe, li ħalliet il-Knisja Anglikana wara d-deċiżjoni li jitħallew isiru qassisin nisa, iddeskriviet din il-proposta bħala “sempliċement stupida” u li “xogħol ftit lunatiċi”.
In-nisa qassisin li qed jimbuttaw din il-proposta qed jisħqu li b’lingwaġġ maskil, jingħata x’jifhem li l-irġiel huma eqreb t’Alla u li d-dominanza ta’ kliem maskili jġiegħel lin-nisa jħossuhom inqas qaddisa. Iridu jiktbu mill-ġdid ċertu partijiet tal-liturġija u ta’ servizzi tal-Knisja Anglikana biex jirriflettu l-bidla fil-kultura dwar il-ġeneru waqt li l-istess kunċett iriduh imwassal anke permezz tal-innijiet, it-talb u l-arti.
Emma Percy, li hi kappillan ta’ Trinity College f’Oxford, qalet li jekk tintuża l-kelma “Hi” għal Alla tkun iktar inklussiva u li għandhom jintużaw kliem li jappellaw kemm għall-irġiel u kemm għan-nisa peress li t-tnejn huma maħluqa fi xbieha t’Alla.
Kate Bottley, qassis mara f’Nottinghamshire, f’intervista ma’ The Sunday Times ta’ Londra qalet li hi u xi qassisin nisa oħra eliminaw bil-mod il-mod kliem maskili meta jirreferu għal Alla. Spjegat li dan hu biss speriment, mhux kampanja bil-mod li għamlu biex ikollhom Isqof mara, imma jridu lin-nies jespandu l-immaġni tagħhom ta’ Alla.
Il-Knisja Anglikana ilha li ordnat qassisin nisa, iktar minn 20 sena ilu imma kkonsagrat l-ewwel Isqof mara iktar kmieni din is-sena.
