Matul is-sena li għaddiet, piloti li kienu fil-fażi li jniżżlu ajruplani f’ajruporti Taljani spiċċaw b’lasers ippuntati direttament f’għajnejhom almenu 1,189 darba f’35 ajruport, 35% iktar min-numru ta’ każijiet fl-2013.
Id-dawl minn laser jista’ joħloq danni permanenti għall-għajnejn u anke telf temporanju tad-dawl, wissiet l-aġenzija nazzjonali Taljana li taħdem f’dik li hi sigurtà tat-titjiriet. Spjegat ukoll li dawn jiġru l-iktar f’ajruporti prinċipali, l-iktar fl-ajruport ta’ Fiumicino f’Ruma fejn is-sena li għaddiet seħħew 135 każ irrappurtat.
Fit-tieni post kien hemm l-ajruport ta’ Napli, b’116-il rapport, dak ta’ Firenze b’103 rapport, l-ajruport ta’ Bologna bi 62 rapport, dak ta’ Turin b’60 rapport ieħor, Venezja b’59 rapport, Bergamo bi 48 rapport u l-ajruport ta’ Malpensa f’Milan b’44 rapport ieħor.
B’xorti ħażina, il-parti l-kbira tal-każi jseħħu billejl u allura minn xħin il-pilota jirrapporta l-każ, il-Pulizija ftit li xejn tkun tista’ tagħmel għax min ikun ipponta laser ħafna drabi jkun laħaq ħarab mill-post.
