Il-President tal-Ukrajna, Petro Poroshenko, wissa lid-deputati parlamentari fi Kiev li l-militar għandu jkun lest biex jiddefendi kontra invażjoni potenzjali ‘totali’ tal-pajjiż mill-qawwiet tar-Russja. Dan waqt li l-inħawi lejn il-Lvant tal-Ukrajna kienu suġġetti għal spinta ta’ vjolenza ġdida.
Ir-Russja ċaħdet li l-militar tagħha hu involut fl-Ukrajna iżda Poroshenko, f’dan il-każ, irrefera ‘għall-istazzjonar ta’ 9,000 suldati Russi’.
Din il-ġimgħa seħħew il-konfronti li kienu jinvolvu t-tankijiet tal-gwerra f’żewġ zoni lejn il-Punent ta’ Donetsk, fl-Ukrajna. Sadanittant, il-President Poroshenko informa lill-Parlament dwar ‘it-theddida kolossali’ li z-zoni indikati tal-Ukrajna jerġgħu jgħaddu mill-istess ġlied qalil ta’ ftit xhur ilu.
L-aħħar vjolenza fl-ibliet ta’ Maryinka u Krasnohorivka ( li huma kkontrollati mill-qawwiet Ukreni) kienet fost l-agħar, fl-Ukrajna tal-Lvant, mindu l-partijiet involuti fil-konflitt tal-Ukrajna, inklużi s-separatisti li jridu l-għaqda mar-Russja, iffirmaw ftehim għall-waqfien mill-ġlied f’Minsk, il-kapitali tal-Belarus.
L-iffirmar inkwistjoni kien seħħ fi Frar u issa l-osservaturi tal-OSCE qalu li ntlemħu l-armamenti ta’ kalibru kbir qed ikunu ttrasferiti lejn il-‘contact line’ fiz-zoni Ukreni kkontrollati mir-ribelli separatisti anki waqt li kien għaddej il-ġlied madwar Maryinka.
