Qorti tal-Appell fl-Eġittu ħarġet direttivi biex l-eks-President Eġizzjan, Hosni Mubarak, jgħaddi ġuri mill-ġdid dwar il-qtil tad-dimostranti li jmur lura għall-2011.
Dan wara li Mubarak ma nstabx ħati fi proċess tal-qorti li seħħ f’Novembru li għadda u wara li hu, oriġinarjament, kien ikkundannat il-ħabs għal għomru b’konnessjoni mal-imwiet ta’ 800 persuna waqt ir-Rivoluzzjoni Storika tal-2011 li ġabet fi tmiemha l-amministrazzjoni tiegħu.
Intant, l-Imħallef tal-Qorti tal-Appell qal li Hosni Mubarak għandu jerġa’ jgħaddi ġuri fil-5 ta’ Novembru. Din għandha tkun it-tielet darba li jinstema’ l-każ.
Aktar kmieni din is-sena, Mubarak, li għandu 87 sena, kien instab ħati dwar korruzzjoni f’każ separat u weħel tliet snin priġunerija.
L-eks-President Eġizzjan, fil-preżent, qed jinżamm fl-isptar militari ta’ Maadi, fil-belt kapitali l-Kajr.
