Il-Pulizija Taljana arrestat 44 persuna li huma akkużati b’rabtiet ma’ kap influwenti tal-mafja. Dan seħħ hekk kif hu magħruf li l-grupp kriminali tal-kap inkwistjoni mmanipula kuntratti pubbliċi f’Ruma li jinkludu fost affarijiet oħrajn kuntratti għar-riċiklaġġ u d-dispożizzjoni tal-iskart kif ukoll għall-manutenzjoni tal-parks u postijiet pubbliċi.
L-arrestati, jinkludu politiċi lokali tal-Lemin u x-Xellug – fosthom il-kunsillier reġjonali Luca Gramazio tal-Partit Forza Italia. Gramazio, f’dan il-każ, qed ikun akkużat li serva bħala kuntatt bejn in-negozjanti korrotti u l-mafja.
L-investigazzjoni li qed tmexxi l-Pulizija ta’ kontra l-mafja kkonċentrat ukoll fuq 21 suspettat ieħor, u l-qawwiet tal-liġi lbieraħ wettqu tfittxija bir-reqqa fin-negozji, l-istabbilimenti u l-uffiċini ta’ dawn il-persuni.
L-arresti huma t-tieni fażi tal-investigazzjoni li fiha, Massimo Carminati, il-kap mafjuż imsemmi, u 36 persuna oħra kienu spiċċaw arrestati f’Diċembru li għadda. Intant, l-arrestati jinkludu wkoll lill-eks-Sindku ta’ Ruma.
Il-Pulizija temmen li minbarra t-tbagħbis tal-kuntratti li kienu joħorġu l-awtoritajiet muniċipali, in-network tal-mafja kien involut ukoll f’kumplott biex tieħu għaliha l-flus kontanti mingħand iċ-ċentri li jipprovdu akkomodazzjoni għall-barranin li qed ifittxu kenn politiku, kif ukoll għall-immigranti li waslu reċentement fl-Italja.
Is-Sindku ta’ Ruma, Ignazio Marino, esprima sodisfazzjon dwar l-arresti u qal li llum hemm in-nies onesti li jridu jagħtu lura kwalità ta’ ħajja xierqa flimkien mad-drittijiet u d-dinjità li jixirqilha l-belt kapitali.
