Alessandro Pansa, il-Kap tal-Pulizija Taljana, qal li qed jissaħħu s-suspetti li terroristi Iżlamiċi huma mdaħħlin fit-traffikar ta’ immigranti li qed isir fil-Mediterran.
Pansa qal dan waqt li kien qed jindirizza kummissjoni tal-Kamra tar-Rappreżentanti Taljana.
Hu qal li s-sena li għaddiet ma kienx hemm ħjiel ta’ din ir-rabta imma tul dawn l-aħħar xhur hemm suspetti qawwija li gruppi terroristiċi bbażati fil-Libja kienu mdaħħlin fl-organizzazzjoni tal-vjaġġi tal-immigranti.
Min-naħa l-oħra, Pansa qal li ma kien hemm xejn li jindika li t-terroristi kienu qed jivvjaġġaw b’dawn il-vjaġġi imma fl-istess ħin qal li wieħed ma seta’ jeskludi xejn. Hu qal li s-suspetti huma li gruppi bħall-ISIS qed jużaw it-traffikar tal-bnedmin fil-Mediterran bħala sors ta’ flus biex jiffinanzjaw l-attivitajiet tagħhom.
Hu żied ukoll li fl-ewwel ħames xhur ta’ din is-sena fl-Italja kienu żbarkaw 41,703 immigranti filwaqt li fl-istess perjodu s-sena li għaddiet dawn kienu 39,900 immigrant.
