Is-serq ta’ klieb fir-Renju Unit fl-aħħar sena żdied b’20%, bi klikek ta’ kriminali jqisu dan bħala mod ġdid kif jagħmlu ftit flus ta’ malajr.
Investigazzjoni mill-ġurnal Mirror tindika li fl-aħħar sentejn insterqu iktar minn 2,400 kelb, li mbagħad inbiegħu b’kuntrabandu.
Dawk li qed jikkampanjaw kontra dan ir-reat qed jinsistu li l-Pulizija fir-Renju Unit mhix tieħu rapporti li jsirulha b’mod serju. Ċifri ppubblikati fil-ġurnali Ingliżi juru li din l-attività kriminali kapaċi trendi mal-£100,000 fis-sena.
L-iktar klieb imfittxija huma Staffordshire bull terriers li jistgħu jintużaw bħala gwardjani imma wkoll għall-ġlied. Warajhom jiġu ċ-Chihuahuas, cocker spaniels, Jack Russells u German Shepherds.
Sylvia Tabor, li hi ċ-Chairperson ta’ Dog Theft Action, qalet li l-liġi Ingliża tqis l-annimal domestiku bħala propjetà ta’ sidu u mhux bħala parti mill-familja, għalhekk sentenzi fil-Qrati jkunu baxxi. Qalet li forsi hu wkoll għalhekk li l-Pulizija ma jqisux dan ir-reat bħala prijorità.
Maria Smith irrakkuntat l-esperjenza tagħha mal-ġurnali Ingliżi meta l-kelb tagħha nsteraq mill-ġnien tagħha stess u mbagħad irċeviet telefonata jitolbuha tħallas £2,000 u jirritornawlha l-kelb tagħha. Il-kelb ittieħed lura d-dar meta l-mara użat Facebook biex tirrakkonta xi ġralha.
